Borga tólf milljarða í skaða­bætur vegna brota læknis skólans

Skólinn hefur barist við málsóknir fyrir alríkisdómstólnum síðan 2018 sem fyrrverandi íþróttanemendur höfðuðu gegn háskólanum fyrir að hafa ekki stöðvað ofbeldi af hendi dr. Richard Strauss. Strauss starfaði við skólann frá 1978 til 1998 og rak einnig læknastofu utan háskólasvæðisins. Hann lést árið 2005.

Á fundi á miðvikudag samþykkti stjórn skólans frumdrög að samkomulagi við alla nema einn af þeim 280 þolendum sem enn áttu kröfur í yfirstandandi málaferlum. Þegar samkomulagið verður gengið frá gæti það markað endalok langvinnrar lagabaráttu og lokað sársaukafullum kafla í sögu skólans.

„Þolendur ofbeldis Strauss eru allir Buckeyes [gælunafn nema skólans], þeir munu alltaf vera hluti af fjölskyldu okkar og samfélagi, og ég trúi því staðfastlega,“ sagði Ravi Bellamkonda, rektor skólans, á fundinum.

„Við erum þeim áfram mjög þakklát fyrir hugrekkið sem þeir sýndu með því að stíga fram og það er okkur mjög mikilvægt að ná endanlegri lausn og það er mikilvægt skref fram á við.“

Fyrir nokkrum árum kom fram í óháðri skýrslu að fjöldi starfsmanna Ohio State hefði vitað af kvörtunum um hegðun Strauss strax árið 1979 en hefði í mörg ár látið hjá líða að rannsaka málið eða grípa til marktækra aðgerða.