Um­fjöllun: Þór - Stjarnan 1-3 | Lífs­nauð­syn­legur sigur Garðbæinga

Stjarnan vann kærkominn sigur gegn Þór í níundu umferð Bestu deildar karla þegar liðin áttust við á VÍS vellinum á Akureyri í dag. Fyrir leikinn hafði Stjarnan ekki unnið leik síðan í annarri umferð og Þór ekki síðan í þriðju umferð. Þór tapar sínum sjötta leik í röð og situr áfram í tíunda sæti en Stjarnan sæti ofar.

Leikurinn var ekki orðinn mínútu gamall þegar Emil Atlason átti skalla í slá eftir aukaspyrnu. Þórsarar heppnir að lenda ekki undir strax í upphafi.

Það voru hins vegar Þórsarar sem skoruðu fyrsta mark leiksins og sitt fyrsta mark í langan tíma. Atli Sigurjónsson tók hornspyrnu frá hægri og boltinn sveif yfir á fjærstöngina þar sem varnarmaður skallaði boltann á Ágúst Eðvald Hlynsson sem lagði boltann fyrir sig og þrykkti honum í fjærhornið.

Stjarnan var stutt frá því að jafna strax í næstu sókn en Birnir Snær Ingason fékk þá sendingu frá Daníel Finns Matthíassyni og átti fast skot að marki en Aron Birkir Stefánsson varði vel. Örvar Logi Örvarsson fékk svo boltann með nánast tómt mark en hitti boltann afleitlega og sóknin úti.

Leikurinn var nokkuð rólegur fram að 35. mínútu en Stjörnumenn héldu í boltann betur án þess að skapa sér nein hættuleg færi á þeim tímapunkti.

Fram að hálfleik var hins vegar allt að gerast og liðin sóttu stíft í sitt hvora áttina og mörg góð færi fóru forgörðum.

Emil Atlason fékk algjört dauðafæri enn gegn markmanni en negldi boltanum lengst yfir.

Ágúst Eðvald Hlynsson og Sigufús Fannar Gunnarsson náðu skoti í átt að marki gestanna sem vörðust vel.

Þórsarar einu marki yfir í hálfleik.

Stjörnumenn komu sterkari út í síðari hálfleik og skoruðu jöfnunarmark á 51. mínútu og var þar að verki Daníel Finns Matthíasson beint úr aukaspyrnu sem var rétt fyrir utan teig hægra megin. Hann lyfti boltanum smekklega yfir veginn og Aron Birkir í marki Þórs varði boltann inn.

Emil Atlason skorði stórglæsilegt mark á 63. mínútu og kom gestunum í forystu. Yann Affi í vörn Þórs skallaði boltann frá marki og þar kom Emil á móti boltanum og tók snertingu áður en hann lét svo vaða markið af löngu færi um leið og boltinn datt í grasið og hann söng í netinu. Óverjandi skot mætti segja.

Á 78. mínútu dró til tíðinda en Þórsarar vildu fá vítaspyrnu eftir viðskipti Guðmundar Kristjánssonar við Christian Jakobsen sem var að reyna ná til boltans í fyrirgjöf en Guðmundur greip í Jakobsen sem féll. Ekkert var dæmt og Guðmundur las yfir Jakobsen á meðan hann lá í grasinu og þeir fóru svo með höfuð sín saman og Jakobsen ýtti í höfuð Guðmunds og fékk fyrir vikið rautt spjald.

Þórsarar því einum færri í stað þessi fá vítaspyrnu og tækifæri til að jafna eins og þeir gerðu sér vonir um.

Guðmundur var á gulu spjaldi en fékk ekki sitt seinna gula spjald fyrir þessi viðskipti.

Þórsarar reyndu hvað þeir gátu að sækja jöfnunarmark einum færri en án árangurs. Í stað þess bættu Stjörnumenn við þriðja markinu í uppbótartímann þegar þeir fóru vel með þrír á tvo stöðu og Haukur Örn Brink skilaði boltanum í markið eftir sendingu Arnars Breka Björnssonar en báðir komu þeir inn af bekknum.

Lokatölur 3-1 fyrir Stjörnunni.

Atvik leiksins

Markið hjá Emil Atlasyni. Kemur á móti boltanum og þrykkir honum inn í þann mund sem hann dettur í grasið og það af löngu færi. Frábært mark.

Stjörnur og skúrkar

Daníel Finns Matthíasson var sprækur í dag og skoraði auk þess frábært mark beint úr aukaspyrnu.

Emil Atlason skorar auðvitað stórglæsilegt mark og er í raun klaufi að skora ekki allavega eitt enn mark.

Örvar Logi Örvarsson hafði í nægu að snúast í bakverðinum og komst vel frá sínu bæði varnar- og sóknarlega.

Hjá Þórsurum átti Aron Birkir Stefánsson margar mikilvægar vörslur þrátt fyrir að hafa fengið á sig þrjú mörk.

Christian Jakobsen lætur reka sig út af þar sem skapið hleypur með hann í gönur og hann á að vita betur.

Dómarinn

Ekki frábærlega dæmdur leikur hjá Twana að mínu mati. Auðvelda leiðin yfirleitt valin og bara dæmd aukaspyrna á það sem er þægilegt miðað við stöðuna í leiknum.

Þórsarar gera tilkall til allavega einnar vítaspyrnu sem var á tæpasta vaði.

Christian Jakobsen fær réttilega rautt spjald en í sama atviki hefði Guðmundur Kristjánsson hæglega getið fengið sitt seinna gula spjald en sleppur vel.

Stemning og umgjörð

Umgjörðin góð í Þorpinu en stemningin í stúkunni hefur svo sannarlega verið betri. Siggi Höskulds óskaði eftir meiri stuðning og látum frá Mjölnismönnum í viðtali fyrir leik en það skilaði sér ekki nægilega vel þó mætingin hafi verið fín.

„Mikil trú í liðinu“

„Bara góð tilfinning. Mér fannst við bara frekar góðir í dag, sköpuðum mikið af færum, og ég er bara ánægður með liðið og ánægður með hópinn og þetta var góður dagur“, sagði Jökull Elísabetarson, þjálfari Stjörnunnar, eftir kærkominn sigur gegn Þór í dag en Stjarnan hafði ekki unnið leik síðan í annarri umferð eða í um sex vikur.

Hvernig fannst þér að horfa á leikinn síðustu 10 mínútur fyrri hálfleiks þegar hraðinn var mikill og færi á báða bóga?

„Mér fannst það bara allt í lagi. Mér fannst eftir svona kannski tíu mínútna kafla, fyrstu tíu mínúturnar, sem var svona frekar og liðin bara að þreifa frekar rólega á leiknum, þá fannst mér bara takturinn í liðinu vera mjög góður og mér fannst við hafa svona einhver tök á leiknum. Þeir skora gott mark og ég get alveg hrósað Þórsliðinu, þetta er vel þjálfað lið, með góðan þjálfara í Sigga (Sigurði Höskuldssyni) og þeir voru trúr sínu og héldu áfram og hrifinn af því en mér fannst við skapa hættulegri færi og bara mikil trú í liðinu. Kom inn í hálfleik 1-0 undir og það er ekkert annað hægt að gera en að halda áfram og við gerðum það vel.“

Stjarnan skoraði þrjú góð mörk í seinni hálfleik og spurning hvort út séu að brjótast gæði sem liðið inniheldur en hefur vantað hingað til.

„Það var ekki að sjá að það væri lítið sjálfstraust í liðinu í dag. Auðvitað tvö svona einstaklingsframtök í fyrstu tveimur og svo svona liðsframmistaða í síðasta og bara mikið lið. Fallegir kaflar oft á tíðum þegar við sköpuðum færi og við klikkum svo á bestu færunum okkar og skoruðu úr erfiðari færum en það er bara að einhverju leyti kannski átti liðið það inni.“

Framundan er tveggja vikna pása á deildinni en Stjarnan spilar þó við Aftureldingu í 8-liða úrslitum Mjólkurbikarsins 10. júní.

„Við tökum okkur nú bara, eigum gott kvöld í kvöld saman, og svo tökum við bara gott frí, verðskuldað, eða kærkomið kannski öllu heldur. Svo gerum við okkur bara tilbúna fyrir bikar.“