Líbanon verið hluti af sam­komu­laginu og Trump þurfi að velja

Greint hefur verið frá því að Íran hafi lokað Hormússundi að nýju vegna árása Ísraels á bandamenn þeirra í Líbanon.

Mohammad Bagher Ghalibaf, forseti íranska þingsins, fullyrðir að vopnahlé í Líbanon hafi verið hluti af tillögunum en Bandaríkjastjórn hefur hafnað þessu í dag. Forsætisráðherra Ísraels segist ætla að halda áfram árásum í Líbanon eftir einar umfangsmestu árásir þeirra í gær. Heilbrigðisyfirvöld segja minnst 112 hafa fallið.

Ghalibaf, forseti íranska þingsins, nefnir að dróni hafi farið inn í Fars-hérað í suðurhluta Írans og þetta feli í sér brot á öðru ákvæði tillaganna. Ísraelski herinn segir breska ríkisútvarpinu BBC að hann sé „ekki meðvitaður“ um slíkt atvik.

Í þriðja lagi segir Ghalibaf að réttur Írans til auðgunar úrans sé hluti af tillögunum. Ákvæði þess efnis mátti finna í yfirlýsingu á persnesku frá þjóðaröryggisráði Írans sem lesin var í íranska ríkissjónvarpinu í gærkvöldi en það vantaði í enska útgáfu tillagnanna sem dreift var til fjölmiðla í gær.

Ghalibaf greinir frá hinum meintu brotum í færslu á X, áður Twitter, og kemur yfirlýsingin í kjölfar frétta þess efnis að Íranski byltingarvörðurinn hafi lokað Hormússundi á ný vegna stórfelldra árása Ísraelshers í Líbanon. 

Byltingarvörðurinn er sagður ætla að svara áframhaldandi árásum þar og vara Ísrael og Bandaríkin við alvarlegum afleiðingum ef þær hætta ekki tafarlaust.

Bandaríkin þurfi að velja

Utanríkisráðherra Íran segir Bandaríkin þurfa að velja á milli vopnahlés og áframhaldandi stríðs „með milligöngu Ísraels.“ Stjórnvöld geti ekki fengið hvort tveggja. 

Seyed Abbas Araghchi, utanríkisráðherra Íran, segir að ákvæði tveggja vikna vopnahlés Bandaríkjanna og Íran séu „skýr og afgerandi.“ Þetta kemur fram í færslu hans á samfélagsmiðlinum X. Samhliða færslunni deilir hann tilkynningu forsætisráðherra Pakistan um vopnahléið þar sem sá fullyrti að samkomulagið næði einnig til Líbanon.

Fréttin hefur verið uppfærð.