Albert gaf Villa mál­verk af mótorhjólaferðinni

Vilhjálmur birti mynd af málverkinu á Instagram-hringrás sinni fyrr í dag og skrifaði við hana: „Grazie Mille Fratm“ sem þýðir á ítölsku: „Þúsund þakkir bróðir minn.“ Þar fyrir neðan stendur, íslenskað úr ítölsku: „Á myndinni: Villi Vill & Albert á lögreglustöðinni, Reykjavík, 29.08.2023.“

„Sigurður Sævar málaði verkið og Albert færði mér það að gjöf. En sagan á bak við verkið er ekki mynd heldur munnleg frásögn Alberts til Sigurðar af þessu atviki þegar við fórum þarna í skýrslutöku hjá lögreglu 29. ágúst 2023,“ sagði Vilhjálmur þegar blaðamaður sló á þráðinn til hans.

„Hann hafði fengið far á lögreglustöðina og ég kom á mótorhjólinu. Eftir skýrslutökuna fékk hann síðan far aftan á mótorhjólinu á skrifstofuna mína,“ sagði Vilhjálmur og vísaði í ódauðleg orð úr vestranum Harley Davidson and the Marlboro Man: „It's better to be dead and cool, than alive and uncool.“

„Hann upplýsti Sigurð Sævar um þetta í munnlegri geymd sem umbreytti síðan þessari frásögn í þetta málverk,“ sagði Vilhjálmur um mótorhjólatúrinn.

Það er ekki oft sem lögfræðingar fá málverk að gjöf frá skjólstæðingum sínum, allavega man Vilhjálmur ekki til þess að hafa fengið slíka gjöf áður.

„Þetta var höfðingleg gjöf frá Alberti og ég er gríðarlega ánægður með myndina. Hún er glæsileg og fangar þetta móment mjög vel,“ sagði hann.

Albert var kærður fyrir kynferðisbrot í ágúst 2023 en héraðssaksóknari felldi málið niður í febrúar 2024. Ríkissaksóknari fyrirskipaði síðan héraðssaksóknara að ákæra í málinu í maí sama ár. Albert var sýknaður í Héraðsdómi Reykjavíkur í október og var málinu þá áfrýjað áfram til Landsréttar. Albert var sýknaður þar 27. nóvember 2025 en Landsréttur klofnaði í málinu.

„Þetta var eina skýrslutakan hjá lögreglu og síðan voru tvær fyrir dómi,“ segir Villi um skýrslutökuna. „Þetta var langt ferli en réttlætið sigraði að lokum,“ sagði Villi.