Að­eins þriðji karlinn til að vinna þrjú Alpagreinagull á sömu leikum

Von Allmen kom sér í hóp fremstu skíðamanna Ólympíusögunnar með því að vinna risasvig karla í dag og tryggja sér þar með sín þriðju gullverðlaun á Ólympíuleikunum í Mílanó og Cortina.

Von Allmen kom í mark á tímanum ein mínúta og 25,32 sekúndur og varð þrettán hundraðshlutum úr sekúndu á undan Bandaríkjamanninum Ryan Cochran-Siegle. Marco Odermatt frá Sviss vann bronsverðlaun á þessum hlýja degi.

Hinn 24 ára gamli von Allmen varð aðeins þriðji alpagreinaskíðamaðurinn í karlaflokki til að vinna þrjár greinar á einum vetrarólympíuleikum. Hinir tveir eru goðsagnir í íþróttinni: Jean-Claude Killy frá Frakklandi, sem vann þrjár greinar á leikunum í Grenoble árið 1968, og Austurríkismaðurinn Anton „Toni“ Sailer, sem vann þrefalt á vetrarleikunum 1956 í Cortina d'Ampezzo á Ítalíu.

Von Allmen vann brunið á laugardag og sigraði í nýrri liðakeppni í tvíkeppni á mánudag ásamt Tanguy Nef.

Eftir hnökralausa ferð sína gaf von Allmen til kynna með hönskunum að þetta væri kannski ekki nóg. Hann rak líka út úr sér tunguna í gríni. Hann var sjöundi keppandinn og enn áttu mörg stór nöfn eftir að renna sér niður fjallið.

Þetta reyndist vera nóg þar sem hann skráði sig enn frekar á spjöld sögunnar og varð fyrsti karlkyns keppandinn frá skíðaþjóðinni Sviss til að vinna risasvig á Ólympíuleikum.

„Ég verð að vera alveg hreinskilinn, sem dreng dreymdi mig ekki endilega um að verða ólympíumeistari, ég var skíðamaður af því að mér fannst það svo gaman,“ sagði von Allmen nýlega.