Boða til blaða­manna­fundar vegna stöðu barna

Þetta kemur fram í fréttatilkynningu frá Ingibjörgu Isaksen þingflokksformanni.  Þar segir að fundurinn verði haldinn í Skála í Alþingishúsinu. Fleira kemur ekki fram í skeytinu, fyrir utan hlekk á væntanlegt YouTube-streymi frá fundinum.

Ingibjörg segir í samtali við Vísi að flokkurinn hafi verulegar áhyggjur af stöðu barna, einkum í ljósi þess að nú taki við þriðji mennta- og barnamálaráðherrann á ársskeiði. 

Inga Sæland, formaður Flokks fólksins, tók við ráðherraembættinu á ríkisráðsfundi í gær eftir að Guðmundur Ingi Kristinsson hætti sem ráðherra sökum veikinda en hann gekkst undir hjartaaðgerð fyrir áramót. Guðmundur gegndi embættinu í tæplega tíu mánuði og á undan honum gegndi Ásthildur Lóa Þórsdóttir embættinu í fjóra mánuði. 

„Það eru margar áskoranir, engin einföld leið,“ segir Ingibjörg sem vill lítið gefa upp um innihald fundarins á morgun. „En við munum fara yfir þessa stöðu betur á morgun.“

Framsóknarmenn fóru með menntamálin í síðustu ríkisstjórn.