Banda­maður Trumps skotinn til bana á fjöl­mennum við­burði

Fylgst er með gangi mála í vaktinni hér neðst í fréttinni.

Kirk, sem var 31 árs gamall og tveggja barna faðir, hafði verið dyggur stuðningsmaður Trumps og MAGA-hreyfingarinnar og hann hafði einnig ítrekað lofað Vladimír Pútín, forseta Rússlands, í opinberri umræðu vestanhafs.

Kirk stofnaði Turning Point USA, sem er einskonar ungliðahreyfing íhaldsmanna í Bandaríkjunum.

Sjá einnig: Greiddu unglingum til að dreifa áróðri til stuðnings Trump

Eins og áður segir var skotárásin fönguð á myndband en Kirk var að ljúka að svara spurningu  frá áhorfenda um skotárásir í Bandaríkjunum, samkvæmt héraðsmiðlinum Salt Lake Tribune, þegar eitt skot ómaði og varð Kirk fyrir skoti.

Hann hafði verið spurður hvort hann vissi hve margar fjöldaskotárásir hafi verið framdar í Bandaríkjunum á undanförnum tíu árum og spurði á móti hvort það ætti að telja árásir sem tengjast skipulagðri glæpastarfsemi með. Strax í kjölfarið var hann skotinn.

Íhaldssami miðillinn Real America's Voice, þar sem Kirk var með sjónvarpsþátt sagði frá því að hann væri látinn.

Vert er að vara lesendur við myndböndunum hér að neðan en það sýnir árásina.

Þegar skotið heyrðist tóku nemendur til fótanna af hræðslu en svo virðist sem fleiri skotum hafi ekki verið hleypt af.

New York Times hefur eftir talsmanni skólans að árásarmaðurinn hafi verið í um 180 metra fjarlægð frá Kirk þegar hann skaut. Skömmu eftir morðið fóru myndbönd af handtöku eldri manns á skólalóðinni í dreifingu og var hann sagður vera árásarmaðurinn. Lögreglan staðfesti í kjölfarið að sá hefði ekki verið árásarmaðurinn en hann var þrátt fyrir það ákærður fyrir að standa í vegi réttvísinnar.

Fylgjast má með nýjustu vendingum kvöldsins í vaktinni hér að neðan. Mögulega þarf að endurhlaða síðuna ef vaktin birtist ekki.