Ungliðahreyfing íhaldsmanna í Bandaríkjunum sem er hliðholl Donald Trump forseta hefur undanfarið greitt unglingum og ungmennum til þess að dreifa áróðri sem styður mál forsetans á samfélagsmiðlum. Sérfræðingar segja herferðina fara í kringum reglur sem samfélagsmiðlar tóku upp til að draga úr upplýsingafalsi og áróðri. Twitter og Facebook hafa þegar bannað nokkra einstaklinga vegna þess.
Hópur ungmenna í Arizona sem hefur tíst og tjáð sig á samfélagsmiðlum til stuðnings Trump forseta og tekið undir sjónarmið framboðs hans til endurkjörs undanfarna mánuði og virtust þar lýsa eigin skoðunum var í raun á launum hjá Turning Point Action, félagi sem tengist Turning Point USA, ungmennahreyfingar íhaldsmanna sem er með höfuðstöðvar í Phoenix, að sögn Washington Post.
Turning Point USA hefur vaxið fiskur um hrygg undanfarin ár en samtökin standa heil að baki Trump forseta og stefnumálum hans. Samtökin greiddu ungmennunum, sem eru sum undir lögaldri, til þess að birta færslur á miðlum eins og Facebook, Instagram og Twitter. Líkt og áróðursherferðin sem rússnesk stjórnvöld stóðu að fyrir forsetakosningarnar árið 2016 voru skilaboðin sem ungmennin deildu oft þau sömu orð fyrir orð, eða nær samhljóða. Tengsl þeirra við Turning Point USA komu hvergi fram.
Twitter segist þegar hafa bannað að minnsta kosti tuttugu reikninga sem tóku þátt í leynilegu áróðursherferðinni fyrir að „misnota miðilinn og amapósta [e. spam]“. Facebook segir að rannsókn standi yfir en nokkrir notendur miðilsins hafi þegar verið bannaðir sömuleiðis.
Enduróma Trump um Covid og póstatkvæði
Washington Post og gagnasérfræðingar fundu hátt í 4.500 tíst sem voru orðuð nánast eins. Talið er að það sé aðeins toppurinn á ísjakanum. Herferðinni virðist hafa verið beint að stjórnmálamönnum úr röðum Demókrataflokksins og fjölmiðlum. Oft tjáðu ungmennin sig í svörum við þeim á samfélagsmiðlum.
Eitt ungmennanna tísti um að fjöldi látinna í kórónuveirufaraldrinum væri vísvitandi ýktur. Einn hvatti fólk til að „treysta ekki dr. [Anthony] Fauci“, sóttvarnasérfræðingi ríkisstjórnarinnar. Trump forseti hefur keppst við að gera lítið úr faraldrinum.
Ungmennin endurómuðu einnig ósannindi Trump um kosningarnar í haust og póstatkvæði sem mörg ríki hafa gert fleiri kjósendur fært að nýta sér til að forðast mannmergð og smit á kjörstöðum. Trump hefur ítrekað fullyrt að póstatkvæðum fylgi stórfelld kosningasvik jafnvel þó að fátt styðji það. Á Instagram hélt eitt ungmennanna því ranglega fram að 28 milljónir atkvæða hefðu „horfið“ í undanförnum fjórum kosningum.
Stjórnendur herferðarinnar eru sagðir hafa tekið ákvarðanir um hvenær ungmennin ættu að birta svör sín á samfélagsmiðlunum. Gættu þeir þess að birta sömu setningarnar ekki of oft og breyta byrjun og enda hverrar setningar til þess að sjálfvirkar síur samfélagsmiðlafyrirtækjanna veittu þeim ekki eftirtekt.
Herferðin virðist þannig hönnuð til að forðast eftirlit og reglur sem samfélagsmiðlar tóku upp eftir að þeir sættu harðri gagnrýni fyrir að leyfa rússneskum og nafnlausum áróðri að vaða uppi árið 2016.
Turning Point USA, hafnaði samanburði á áróðursherferð samtakanna annars vegar og svokallaðrar „tröllaverksmiðju“ Rússa fyrir fjórum árum í yfirlýsingu vegna fréttar blaðsins.
„Þetta er stjórnmálaþátttaka í góðri trú af hálfu alvöru fólks sem hefur ástríðufulla sannfæringu fyrir því sem það lýsir á netinu, ekki nafnlaus tröllaverksmiðja í Rússlandi,“ segir í yfirlýsingu samtakanna. Herferðin sé leið til þess að breiða út boðskapinn á tímum þegar kórónuveirufaraldur kemur í veg fyrir hefðbundið stjórnmálastarf.
Charlie Kirk, leiðtogi Turning Point USA, hélt opnunaræðuna á landsfundi Repúblikanaflokksins sem var haldinn í síðasta mánuði. Hann gaf ekki kost á viðtali vegna áróðursherferðarinnar. Trump forseti hefur oft hampað Kirk, meðal annars með því að deila tístum hans á Twitter-reikningi sínum sem milljónir manna fylgja.
