Segir ráð­herra sjálfum í lófa lagið að breyta leik­reglum svo á­góðinn rati vestur

Níu manns starfa við fóðurstöð Arctic Fish á Þingeyri sem verður sameinuð höfuðstöðvum fyrirtækisins á Ísafirði og flytjast störfin því þangað. Áformin eru umdeild en bæjarstjórinn á Ísafirði segir ákvörðunina sorglega og hún muni hafa víðtæk áhrif.

„Við metum þessa starfsmenn mikils en auðvitað hefur maður skilning á því þegar að níu störf hverfa úr samfélaginu þó að fólkið haldi vinnunni, ég ætla ekki að gera lítið úr því, alls ekki,“ segir Daníel Jakobsson, forstjóri Arctic Fish.

Reyni að koma til móts við starfsfólkið

Fyrirtækið geri fjölmargar ráðstafanir til að koma til móts við starfsfólkið. „Til þess að koma til móts við þessa frábæru starfsmenn okkar á Þingeyri þá bjóðum við þeim upp á að keyra á vinnutíma, við sköffuðum bíl til þess að ferðast á milli og erum að reyna að gera þetta þannig að þetta sé sjálfbært fyrir þau til lengri tíma og við viljum hafa þau áfram í starfi hjá okkur.“

Ákvörðunin hafi að sögn Daníels verið vandlega ígrunduð og hafi það að leiðarljósi að auka gæði starfseminnar. „Þetta er einungis aðgerð til þess að bæta vöxt og velferð fiskanna okkar. Og á Þingeyri hefur byggst upp alveg gríðarlega mikil þekking hjá þessu starfsfólki sem er í þessu þar. Þess vegna leggjum við mikið á okkur til þess að koma til móts við þau, hvert og eitt,“ segir Daníel. Ekki felist sparnaður í ráðstöfuninni heldur kostnaðarauki, að minnsta kosti til að byrja með.

Ráðherra líti sér nær

Eyjólfur Ármannsson innviðaráðherra sagði í hádegisfréttum Bylgjunnar að ákvörðunin væri gríðarlegt högg. Hann muni beita sér fyrir því að hún verði dregin til baka, og segir að fiskeldisfyrirtæki þurfi að sýna samfélagslega ábyrgð.

„Ég held að það sé alveg fullkomlega eðlilegt að þingmenn og sveitarstjórnarfulltrúar kjördæmisins beri hag íbúanna sinna fyrir brjósti. Ég vil þó á það benda að fólk getur talið störfin sem að ríkið og sveitarfélögin eru með á Þingeyri í fyrsta lagi. Og í annan stað að þá er það þannig, að þrátt fyrir taprekstur á þessu ári greiðir Arctic Fish 700 milljónir á ári í fiskeldisgjald, 100 milljónir í umhverfissjóð, þannig 800 milljónir í sérstaka fiskeldisskatta. Þrátt fyrir það að stór hluti af okkar fiski sé að koma úr Dýrafirði hef ég ekki orðið var við að neitt af þeim peningum renni í Dýrafjörð,“ segir Daníel.

Ráðherra gæti litið sér nær í þessum efnum. „Sveitarstjórnarráðherra væri í lófa lagið að breyta þeim leikreglum og tryggja það að þeir sem eru að búa til, eða þau samfélög séu að búa til þetta eldisgjald, fái það þá til baka til sín, en það renni ekki allt í hítina í 101,“ segir Daníel.

Styrkja nærsamfélagið burt séð frá rekstrartapi

Þar að auki hafi fyrirtækið frá upphafi lagt sig fram við að gefa af sér til samfélagsins. Arctic Fish hafi meðal annars tekið þátt í að kaupa björgunarbát fyrir björgunarsveitirnar á Þingeyri, Flateyri og á Patreksfirði. „Við setjum gríðarlega mikla peninga, þrátt fyrir að hafa aldrei skilað hagnaði í tíu ára sögu fyrirtækisins, í samfélagsleg verkefni á Vestfjörðum. Ég held það séu um þrjátíu milljónir á þessu ári.

Alls starfa hátt í 130 manns hjá fyrirtækinu víðsvegar á Vestfjörðum, og kemur störfum til með að fjölga á næstu árum þegar eldisstöðvum þess fjölgar úr fimm í níu.

„Ég held að við sinnum samfélagslegri ábyrgð best með því að standa okkur vel í rekstri, tryggja það að þessi störf verði á Vestfjörðum. Á þessu ári er verið að ráða tuttugu nýja starfsmenn og verkefni okkar er í raun og veru að tryggja það að vöxtur og viðgangur á Vestfjörðum sé til staðar og það verði störf á Vestfjörðum í eldinu og við höfum reynt að dreifa því um alla Vestfirði, eins og ég fór yfir áðan þá eru þau tiltölulega jafnt í um fimm fjörðum á Vestfjörðum,“ segir Daníel.