Reka stór­lið Lyon úr frönsku deildinni

Lyon spilar því í frönsku b-deildinni á næstu leiktíð.

Franska deildin hafði varað Lyon við í nóvember síðastliðnum að þetta yrði niðurstaðan kæmi félagið rekstrarmálum sínum ekki í lag. Það tókst ekki og í dag voru örlög félagsins staðfest.

Lyon endaði í sjötta sætinu í frönsku deildinni á síðustu leiktíð og komst alla leið í átta liða úrslit Evrópudeildarinnar.

Lyon er í eigu bandaríska viðskiptajöfursins John Textor sem er á sama tíma að selja hlut sinn í enska úrvalsdeildarliðnu Crystal Palace.

Í nóvember var það gert opinbert að Lyon skuldaði 175 milljónir evra og þá var ekkert plan til um að vinna upp þá skuld.

Textor á líka brasilíska félagið Botafogo en var neitað um það að færa pening þaðan yfir til Lyon.

Lyon seldi á dögunum Rayan Cherki til Manchester City fyrir 42,5 milljónir evra en það dugði skammt.

Forráðamönnum Lyon tókst ekki að sannfæra hæstráðendur hjá frönsku deildinni sem stóðu við fyrri ákvörðun og sendu félagið niður í B-deildina.