Ronaldo verður ekki með á HM fé­lags­liða

Samningur hins fertuga Ronaldos við sádiarabíska liðið Al-Nassr rennur út í lok júnímánaðar, en liðinu mistókst að vinna sér inn sæti á HM félagsliða sem hefst eftir slétta viku.

Sjálfur hafði Ronaldo sagt að hann yrði ekki áfram í herbúðum félagsins á næsta tímabili og því hafa margir velt því fyrir sér hvort hann hafi ætlað að finna sér lið sem tekur þátt á mótinu áður en það hefst.

Nú hefur Ronaldo sjálfur hins vegar greint frá því að svo verði ekki.

„Ég mun ekki taka þátt á HM félagsliða,“ sagði Ronaldo.

„Það hafa nokkur lið haft samband. Sum þeirra hefðu passað vel fyrir mig, önnur ekki, en það er ekki hægt að reyna að gera allt. Það er ekki hægt að grípa hvern einasta bolta,“ bætti Ronaldo við.