Sara Björk hittir á­horf­endur og sendir stelpunum okkar EM kveðju

Landsbankinn stendur fyrir verkefninu „Skrifum söguna saman“ í samstarfi við KSÍ.

Búið er að strekkja breiðtjald á striga sem áhorfendur geta skrifað á, áður en þeir fara upp í stúku og sjá fyrsta landsleikinn á nýja Laugardalsvellinum, sem hefst klukkan sex í kvöld. 

Sara Björk Gunnarsdóttir, fyrrum landsliðsfyrirliði til fjölda ára, verður á svæðinu og skrifar á spjaldið sem stelpurnar okkar munu svo taka með sér út á Evrópumótið í Sviss.

Sátt við að hafa kvatt landsliðið

Sara lék sinn fyrsta landsleik árið 2007, enn aðeins sextán ára gömul, og á leikjametið á Íslandi með því að hafa spilað 145 leiki. Hún fór til að mynda fjórum sinnum á EM en eftir að Íslandi mistókst að komast á HM, með sáru tapi í framlengdum leik í Portúgal haustið 2022, ákvað Sara að landsliðsskórnir færu á hilluna.

Spilar í Sádi-Arabíu

Eftir að hafa spilað með toppliðum á Ítalíu, í Frakklandi og Þýskalandi tók Sara að sér ansi ólíkt verkefni og lék með Al Qadsiah í Sádi-Arabíu í vetur. Hún segir síðustu níu mánuði hafa verið lærdómsríka og gefur lítið fyrir tal um að erlent íþróttafólk þar taki þátt í hvítþvotti ríkisins af mannréttindabrotum.

Liðið þarf stöðugleika

Landsliðsþjálfarar Íslands hafa ekki reynt að fá hana til að snúast hugur og Sara hefur í vetur einbeitt sér að því að spila með liði Al Qadsiah í sádiarabísku deildinni. Hún fylgist þó með framgangi íslenska liðsins og segir allt opið fyrir liðið á Evrópumótinu í Sviss í sumar en að til þess þurfi meiri stöðugleika.

„Ég fylgist með liðinu. Mér finnst þær vera upp og niður. Þær eiga sína leiki eins og þegar þær unnu til dæmis Þýskaland í fyrra hér heima. Það var ótrúlegt – frábær leikur. En mér finnst vanta ákveðinn stöðugleika í liðið. Þetta er eiginlega alltaf það sama, um að halda bolta betur innan liðsins.

Og þegar ég horfi á leikina núna í sjónvarpi þá sé ég að það eru möguleikar til staðar. Við erum með leikmenn sem eiga að geta tekið meira við boltanum á miðjunni en mér finnst alltaf smástress, kannski smáhræðsla eða óöryggi, og við lendum oft í þessum löngu boltum. Það virkar oft en er líka takmarkað stundum, sérstaklega þegar hin liðin lesa það og taka Sveindísi út. Þá er jókerinn okkar farinn“ sagði Sara í viðtali við Sindra Sverrisson fyrir skemmstu. Viðtalið í heild sinni má sjá í spilaranum hér fyrir neðan.