Greindist með skyr­bjúg eftir notkun megrunarlyfs

Hinn 51 árs Williams fór í stórt viðtal við Mirror fyrir komandi tónleikaferðalag sitt og lýsti þar heilbrigðisvandræðum sínum. Hann segist hafa tekið sykursýkislyf í ætt við Ozempic til að léttast og misst rúm tólf kíló.

„Ég hætti að borða og fékk ekki næringu,“ sagði Williams. Í kjölfarið hafi hann fundið fyrir svo miklum C-vítamín-skorti að hann var greindur með skyrbjúg. 

„Sautjándu aldar sjóræningjasjúkdómur,“ sagði Robbie um skyrbjúginn sem er ekki algalin lýsing. 

Skyrbjúgur (scorbutus) er hörgulsjúkdómur sem stafar af C-vítamíns skort og var algengur hjá sjómönnum í aldir og sérstaklega mikið vandamál í lengri sjúkdómum. Eftir kerfisbundnar rannsóknir um miðja 18. öld uppgötvaðist að sjúkdómurinn orsakaðist af skorti á askorbínsýru eða C-vítamíni.

Williams hefur barist við líkamsskynjunarröskun (e. body dysmorphia) um árabil og opnaði sig um líkamsímynd sína 2023. Vegna röskunarinnar túlkaði hann áhyggjur fólks af því að hann væri orðinn of grannur sem frábærar.

„Með líkamsskynjunarröskun, þegar fólk segist hafa áhyggjur af því hvernig þú lítur út, segir þú: ,Mér hefur tekist það.' Þegar fólk segir: , Við höfum áhyggjur af því að þú sért of grannur' fer það inn í höfuðið mitt sem: ,Dottinn í lukkupottinn. Ég er kominn í fyrirheitna landið',“ sagði Williams við Mirror.

Taldi sig vera lausan við þunglyndið

Williams, sem greindist með þunglyndi snemma á ferli sínum, lýsti því hvernig hann hefði í fyrsta skiptið í tíu ár fundið aftur fyrir einkennum þunglyndisins

„Árið byrjaði á slæmri geðheilsu, sem ég hef ekki fundið fyrir í mjög mjög langan tíma. Ég var dapur, ég var kvíðinn, ég var þunglyndur,“ sagði söngvarinn sem hafði talið sig vera búinn með þann kafla ævi sinnar.

„Ég hélt þetta væru endalok þeirrar sögu og ég myndi bara ganga inn í þetta stórkostlega undraland. Að það skyldi snúa aftur var ruglandi,“ sagði Williams um þunglyndið.

Árið í ár var erfitt fyrir Williams sem viðurkenndi að honum gengi illa að eiga við veikindi foreldra sinna. Móðir Robbie, Janet Williams, greindist með elliglöp í fyrra og fjórum árum fyrr greindist faðir hans, Pete Conway, með Parkinson-taugahrörnunarsjúkdóm.

„Í sannleika sagt er ég mjög upptekinn og mér gengur illa að eiga við aðstæðurnar. Ég veit ekki hvernig ég á að gera það, þetta er ótrúlega flókið,“ sagði Williams sem vildi þó ekki ræða málið frekar.

Williams hefur átt flókið samband við foreldra sína eins og kom fram í ævisögumyndinni Better Man sem kom í bíóhús hérlendis fyrr á árinu. Þar er fjallað um hvernig faðir hans fór frá fjölskyldunni þegar Robbie var barn og hvernig móðuramma Robbie, sem hann var af náinn, greindist með elliglöp og hrakaði hratt. 

Gagnrýnandi Vísis rýndi í Better Man í febrúar og var ansi ánægður með ævisögumyndina.