Kenndi Biden, flug­mönnum, flug­um­ferðar­stjórum og „DEI“ um slysið

Hann gagnrýndi einnig áhöfn herþyrlunnar sem skall á farþegaflugvél svo 67 manns létu lífið, auk þess sem hann sagði Joe Biden, fyrrverandi forseta, og Pete Buttigieg, fyrrverandi samgönguráðherra, bera ábyrgð á slysinu vegna meintra ráðninga á fólki sem forsetinn sagði vera vanheilt á geði og greindarskert.

Það hefði verið gert á grunni DEI og um væri að ræða stefnu sem heimilaði einnig ráðningu sjón- og heyrnarskerts fólks og fólks með dvergvöxt.

„Við verðum að vera með okkar gáfaðasta fólk,“ sagði Trump. „Þeir verða að vera náttúrulega hæfileikaríkir snillingar.“

Þegar Trump var spurður hvernig hann gæti kennt DEI-stefnum um slysið svaraði hann: „Af því að ég hef almenna skynsemi og því miður eru margir sem hafa hana ekki.“

Þetta sagði Trump á blaðamannafundi sem hann hélt fyrr í kvöld. Innan við sólarhring eftir að slysið varð og áður en vitað er með vissu hvað olli slysinu.

Forsetinn byrjaði að votta fjölskyldum þeirra sem létu lífið samúð sína, áður en hann byrjaði að fara um víðan völl um slysið.

„Við vitum ekki hvað leiddi til slyssins enn en við höfum mjög sterkar skoðanir,“ sagði Trump.

Hann velti, eins og fram kemur í frétt AP fréttaveitunnar, vöngum yfir því hvort þyrluflugmennirnir hefðu verið með nætursjónauka, lýsti því yfir að um væri að ræða „flugmannavanda“, sagði að þyrlunni hafi verið flogið „á ótrúlega slæmri átt“ og spurði af hverju flugmenn þyrlunnar hefðu ekki stöðvað hana. Því hægt væri að stöðva þyrlur mjög hratt.

Þá virtist hann einnig gagnrýna flugumferðarstjóra vegna þess að þyrlan og flugvélin, sem var í aðflugi fyrir lendingu, hafi verið á sömu hæð.

Trump, sem rak nýlega yfirmann flugumferðarstofnunar Bandaríkjanna (FAA), tók Sean Duffy, nýjan samgönguráðherra, upp á svið og ítrekaði við hann að slysið væri ekki honum að kenna.

Mönnun ekki eðlileg

Blaðamenn AP fréttaveitunnar hafa komið höndum yfir skýrslu frá rannsakendum FAA þar sem fram kemur að einn flugumferðarstjóri hafi verið að sinna tveimur stöðum þegar slysið varð. Mönnun hafi ekki verið eðlileg, miðað við umfang flugumferðar á þessum tíma.

Buttigieg hefur tjáð sig um ummæli Trumps of fordæmt þau harðlega sem fyrirlitleg.

„Á meðan fjölskyldur syrgja, ætti Trump að leiða, ekki ljúga,“ skrifaði Buttigieg í færslu á X. Hann sagði að á tíma síðustu ríkisstjórnar hefði öryggi verið aukið og flugumferðarstjórum fjölgað. Ekkert alvarlegt slys hefði átt sér stað á þessum tíma.

Trump, sem stýrði núna bæði hernum og FAA, hefði gert það að einum sínum fyrstu verkum að reka mikilvæga starfsmenn flugumferðarstofnunarinnar. Nú væri tíminn til að leiða og útskýra fyrir þjóðinni hvað hann ætlaði að gera til að tryggja að þetta kæmi ekki fyrir aftur.

Á einum tímapunkti á blaðamannafundinum í kvöld sagði blaðamaður Trump að það væri alls ekki rétt að ráðningarstefnan sem hann hefði nefnt væri ný og hefði verið sett á laggirnar í forsetatíð Bidens.

„Hver segir það, þú?“ spurði Trump þá.

Blaðamaðurinn benti þá á að þessi stefna hefði fyrst verið nefnd á vef FAA árið 2013 og spurði af hverju Trump hefði ekki fellt hana úr gildi í fyrri forsetatíð hans. Trump sagðist þá hafa breytt henni en að Biden hefði breytt henni til baka.

Chuck Schumer, leiðtogi Demókrataflokksins í öldungadeild Bandaríkjanna, gagnrýndi Trump einnig harðlega í kvöld. Hann sagði ótækt að forseti Bandaríkjanna kastaði fram ummælum eins og hann hefði látið frá sér í kvöld, á meðan enn væri verið að leita að líkum fólks í Potomac-ánni og tilkynna fjölskyldum að ástvinir þeirra væru látnir.

„Manni verður bumbult,“ skrifaði Schumer.

Uppfært 21:15

Trump hefur skrifað undir forsetatilskipun um sem snýr að því að binda enda á meintar ráðningar á grunni litarhafts eða kyns. Við athöfnina sagði hann hinar svokölluðu DEI-stefnur skammarlegar og sagði Biden og Demókrata hafa valdið miklum skaða.

Inntur eftir því hvort hann vildi í alvörunni meina að kynþáttur eða kyn einhverra sem að málinu koma gæti hafa valdið slysinu, sagði hann: „Mögulega. Vanhæfi gæti hafa spilað inn í.“