Innlent

Vill hefja fram­kvæmdir við Hvammsvirkjun fyrir árs­lok

Kristján Már Unnarsson skrifar
Séð yfir áhrifasvæði Hvammsvirkjunar. Þjórsá verður stífluð á móts við Skarðsfjall, sem sést hægra megin fyrir miðju. Kirkjustaðurinn Stórinúpur lengst til vinstri. Fjær sjást Búrfell fyrir miðri mynd og Hekla til hægri.
Séð yfir áhrifasvæði Hvammsvirkjunar. Þjórsá verður stífluð á móts við Skarðsfjall, sem sést hægra megin fyrir miðju. Kirkjustaðurinn Stórinúpur lengst til vinstri. Fjær sjást Búrfell fyrir miðri mynd og Hekla til hægri. Landsvirkjun

Landsvirkjun er komin með öll tilskilin leyfi fyrir Hvammsvirkjun í Þjórsá og stefnir að því að hefja framkvæmdir fyrir árslok. Sveitarstjórn Skeiða- og Gnúpverjahrepps samþykkti framkvæmdaleyfi í dag.

Í fréttum Stöðvar 2 kom fram að virkjunin telst þó vart vera búin að fá grænt ljós. Búið er að kæra virkjunarleyfið, sem Orkustofnun gaf út í síðasta mánuði, og fleiri kærumál eru í gangi.

Hörður Arnarson, forstjóri Landsvirkjunar, tjáði fréttastofu síðdegis að þrátt fyrir kærur hygðist fyrirtækið setja undirbúning framkvæmda strax á fulla ferð með það að markmiði að þær hæfust fyrir árslok. Sagði hann þörfina svo brýna á meiri orku að það mætti ekki dragast lengur.

Inntakslón fyrir Hvammsvirkjun myndast neðan við bæinn Haga.Landsvirkjun

Í myndskeiði fréttarinnar má sjá hver sýnilegustu umhverfisáhrif virkjunarinnar verða. Neðan við bæinn Haga neðst í Þjórsárdal myndast fjögurra ferkílómetra inntakslón og flúðir í ánni fara á kaf.

Virkjunin mun hins vegar njóta allra þeirra miðlunarlóna sem þegar eru til staðar ofar á vatnasviði Þjórsár og Tungnaár á hálendinu og telst þetta lón tiltölulega lítið miðað við svona stóra vatnsaflsvirkjun.

Ef allt fer á fullt í vetur verður þessi án efa með stærstu framkvæmdum á Íslandi næstu fjögur árin, ef ekki sú stærsta, en stefnt er að gangsetningu virkjunarinnar snemma árs 2029.

Í milljörðum talið má áætla að smíðin kosti á bilinu 60 til 70 milljarða króna. Uppsett afl hennar verður 95 megavött, álíka og í Búðarhálsvirkjun og Vatnsfellsvirkjun.

Hvammsvirkjun er ætlað að framleiða um 740 gígavattsstundir raforku á ári. Söluverðmæti þeirrar orku má áætla að geti orðið á bilinu 5,5 til 6 milljarðar króna á ári. Þannig gæti þessi virkjun orðið mjög arðbær og hún borgað sig upp á kannski tíu til tólf árum.

Teikning af fyrirhugaðri brú yfir Þjórsá. Horft er til norðurs, frá Rangárvallasýslu yfir í Árnessýslu.Vegagerðin

Talsverð samgöngubót mun fylgja virkjuninni í uppsveitum Suðurlands. Á móts við þéttbýlið í Árnesi verður lagður nýr vegur vegna framkvæmdanna, Búðafossvegur, með nýrri brú yfir Þjórsá.

Vegurinn og brúin munu stytta vegalengdir um tugi kílómetra milli efstu byggða í Árnes- og Rangárvallasýslu og telja ráðamenn Skeiða- og Gnúpverjahrepps að brúin muni ásamt öðru styrkja Árnes verulega sem þéttbýlisstað.

Sunnlendinga hefur lengi dreymt um að fá brúna, eins og fram kom í þessari frétt Stöðvar 2 sumarið 2009, fyrir fimmtán árum:

Deilur um Hvammsvirkjun Landsvirkjun Skeiða- og Gnúpverjahreppur Rangárþing ytra Orkumál Vatnsaflsvirkjanir Orkuskipti Loftslagsmál Umhverfismál Skipulag Efnahagsmál Vegagerð Samgöngur

Tengdar fréttir

Samþykkti framkvæmdaleyfi fyrir Hvammsvirkjun í Þjórsá

Sveitarstjórn Skeiða- og Gnúpverjahrepps samþykkti í dag umsókn Landsvirkjunar um framkvæmdaleyfi Hvammsvirkjunar í Þjórsá með fjórum atkvæðum gegn einu. Þar með hafa bæði hlutaðeigandi sveitarfélög samþykkt framkvæmdaleyfi en sveitarstjórn Rangárþings ytra samþykkti leyfið fyrir sitt leyti í síðustu viku, þann 16. október.

Ný Þjórsárbrú við Árnes sett í salt eins og Hvammsvirkjun

Ný brú yfir Þjórsá á móts við Árnes, sem til stóð að bjóða út í haust, frestast um óákveðinn tíma eftir að virkjunarleyfi Hvammsvirkjunar var fellt úr gildi. Oddvitar sveitarfélaganna beggja vegna Þjórsár vonast til að brúarsmíðin tefjist ekki of mikið og segja brúna hafa mikla þýðingu fyrir uppsveitir Suðurlands.

Mest lesið


Fleiri fréttir

Sjá meira


×

Mest lesið