Hrakfallasaga Sigga mæjó í Liverpool

Blaðamaður hafði heyrt undan og ofan af hrakfallasögunni miklu en símtalið við Sigga mæjó byrjaði með nokkrum ósköpum.

„Sæll Jakob. Geturðu hringt eftir hálftíma. Ég er að bíða eftir að verkjatöflurnar fari að kikka inn. Ég er í Rotterdam.“

Plataður til að vera aðstoðarfararstjóri í Bítlaferð

Hálftíma síðar:

„Já, þetta er allt annað.“

Ók. Og hvað ertu að gera í Rotterdam?

„Þetta er með því fyndnara sem ég hef lent í,“ sagði Siggi og hlær. Blaðamaður á erfitt með að sjá þetta fyrir sér sem fyndið en Siggi hló í öðru hverju orði. Honum er greinlega lagið að sjá kómísku hliðarnar á tilverunni. Og best að byrja á byrjuninni:

„Ég var sjanghæjaður um þar síðustu helgi sem aðstoðarfararstjóri fyrir Kirkjukórinn í Hveragerði. Sá sem sjanghæjaði mig með var nú bara Óli Palli vinur minn sem mátti taka félaga með og hann útnefndi mig sem slíkan. 

Við lentum í Liverpool, þetta var Bítlatúr, og við lentum þarna um tíu leitið. Og fengum að geyma töskurnar á hótelinu, ekki hægt að tékka inn fyrr en þrjú. Og svo örkuðum við í gegnum Bítlasafnið, ég með annan hluta hópsins og Óli Palli hinn.“

Hné niður og umsvifalaust hringt á sjúkrabíl

Óli Palli er útvarpsmaðurinn Ólafur Páll Gunnarsson, æskuvinur Sigga, þeir ólust upp í húsum sem stóðu hlið við hlið og hafa ætíð verið góðir vinir, alla tíð raunar. Óli Palli fékk Sigga með sér í Fjallabræður á sínum tíma. Fjallabræður munu syngja á Heimahátíðinni sem verður uppi á Skaga um næstu helgi en þá verður Siggi fjarri góðu gamni eins og nánar verður komið að síðar.

„Þegar við vorum að klára fór ég að finna eitthvað skrítið í maganum. Þarna var klukkan bara hálftvö. Við ákváðum að leyfa fólkinu að njóta borgarinnar og við Óli vorum að rölta einir. Þá fékk ég svakalegan verk í maga og líka herðablöðin. Þannig að ég hrundi niður á einhvern stól. 

Óli Palli „googlaði“ eitthvað, þetta virkaði eins og hjartaáfall þannig að hann hringdi á sjúkrabíl. Ég var fluttur beint uppá sjúkrahús. Þá hafði verið komið gat á magann á mér í flugvélinni, sem hafði stækkað. Þetta hefur pottþétt verið eitthvað undirliggjandi.“

Og hver var greiningin?

„Nú er ég ekki læknir en þetta hefur væntanlega verið eitthvað magasýruvesen. Við gátum í það minnsta útilokuðum hjartaáfallið. Ég gat ekki talað fyrir verkjum. Óli Palli var með mér þar til hann þurfti að fara með hópinn á tónleika. Svo lenti ég í sex tíma skurðaðgerð á sjúkrahúsinu í Liverpool, háskólasjúkrahúsinu þar.“

Sestir upp hjá dóttur Sigga í Rotterdam

Þar lá svo Siggi með súrefni og þvaglegg. En var útskrifaður á sunnudaginn með þeim fyrirmælum að hann má ekki fljúga næstu fjórar vikurnar. Sem setti heldur betur strik í reikninginn.

„Ég átti að koma heim á mánudaginn, þetta áttu bara að vera þriggja daga ferð. Óli hringdi strax í systur mínar tvær og þær voru mættar og voru hjá mér fram á mánudag. Ég var rétt vaknaður þegar þær voru mættar. Svo komu foreldrarnir.“

Siggi segir svo frá að hann eigi dóttur sem er í tónlistarnámi í Rotterdam. Móðir hans fór heim á mánudag en Siggi og faðir hans hins vegar vissu ekki alveg hvað þeir áttu að gera við sig en það varð úr að þeir tóku lest til Rotterdam í Hollandi.

„Við erum sestir upp hjá dóttur minni. Pabbi er nýkominn úr hnjáskiptaaðgerði þannig að við erum skemmtilegir hér; haltur leiðir blindann.“

Má aldrei borða íbóprófín aftur

Stefnan er svo að sigla heim á sunnudaginn með viðkomu í Færeyjum. Það er bara næsti fraktari,“ segir Siggi og skellihlær.

Þegar við ræðum þetta gat á maganum nánar segir Siggi að hann hafi rifbeinsbrotnað fyrir fjórum vikum.

„Ég hef verið að éta mikið af verkjalyfjum og þeir vildu meina að ibóprófín væri ekki gott fyrir magann. Ég má víst ekki borða svoleiðis, aldrei aftur, maður lærir alltaf eitthvað nýtt. En sjúkrahúsið þarna er alveg frábært og yndislegt starfsfólk. Mjög faglegt í alla staði,“ segir Siggi.

Siggi lýsir því svo að sérdeilis fínt sé að hafa föður sinn með í för, hann heiti Jón Sigurðsson, ætíð kallaður Jón Forseti og það sé fínt að geta viðrað kallinn. Hann þurfi á göngutúrum að halda.

„Óli var með mér allan tímann á sjúkrahúsinu. Hann sagði: „Þú verður að tóra, ég hef aldrei misst mann,“ segir Siggi og hlær. Óli Palli segir í samtali við Vísi að vitaskuld hafi aldrei neitt annað komið til greina.

„Systur mínar fóru í staðinn á Cavern-klúbbinn meðan ég lá í móki á sjúkrahúsinu. Ég fékk ekki að borða fyrr en á fimmtudaginn, mátti ekki einu sinni drekka.“

Má sigla en ekki fljúga

Siggi segir að það hafi aldrei liðið yfir sig en hann hafi hins vegar ekki getað talað fyrir kvölum.

„Þegar ég var spurður um hversu mikill sársaukinn væri á mælikvarðanum einn til tíu. Ég gat stunið upp sex og þá sprakk Óli úr hlátri; þú getur ekki einu sinni talað! En þetta er líklega ástæðan, magasýrurnar, rifbeinsbrot, og pilluát. Vildu þeir meina.“

Ástæðuna sem hinir ágætu læknar á sjúkrahúsinu í Liverpool gáfu þegar þeir bönnuðu Sigga að fljúga var þrýstingurinn sem myndast í flugvélinni.

„Ég má alveg sigla, ekkert mál en það er þrýstingurinn uppi. Þetta var gat á stærð við tíkall. Þurfti að sauma þetta saman og er enn að gróa. Allir þessir saumar. En ég verð betri með hverjum deginum.“