„Vil miklu frekar eiga feril í MMA heldur en að vinna skrif­­stofu­­starf“

Segja má að Logi hafi átt skínandi frum­raun þegar að hann reyndi fyrir sér í fyrsta sinn í MMA á Norður­landa­meistara­mótinu í Dan­mörku á dögunum.

Frá sjö ára aldri hefur nú hinn 19 ára gamli Logi reynt fyrir sér í hinum ýmsu bar­daga­listum og nú hefur hann tekið skrefið inn í MMA þar sem ó­hætt er að segja að hann hafi byrjað sinn keppnis­feril af krafti.

Hefur ekki kynnst öðru eins

Logi, sem æfir og keppir undir merkjum Mjölnis, gerði sér lítið fyrir og tryggði sér Norður­landa­meistara­titilinn í MMA í Dan­mörku á dögunum og það í frum­raun sinni í bar­daga­búrinu.

„Þetta var súrealísk upp­lifun. Ég í raun trúði þessu ekki fyrr en að ég var kominn inn í búrið og dómarinn gaf til kynna að bar­daginn væri hafinn,“ segir Logi sem hefur verið við­riðinn bar­daga­listina frá sjö ára aldri.

„Þá byrja ég að æfa taekwondo og um tólf ára aldurinn fór ég að finna fyrir löngum fyrir því að taka næsta skref og prófa eitt­hvað nýtt. Þá skráði ég mig í MMA ung­lingar nám­skeiðið hjá Mjölni. Það stóðst undir öllum mínum væntingum og það má segja sem svo að ég hafi alveg fundið mig í upp­gjafar­glímunni.“

„Þar byrjaði ég sem minni­máttar. Það voru allir tölu­vert stærri en ég. En eftir því sem leið á varð ég bara betri og betri. Ég fann hversu stórt hlut­verk bar­daga­tæknin hafði í upp­gjafar­glímunni. Það voru góðar fréttir fyrir mig því ég elska að út­færa og pæla í henni.

Þá var æfinga­andinn einnig svo góður hér hjá Mjölni og spilaði stóra rullu í því hversu vel manni leið á æfingum. Þegar að við vorum búnir að glíma tókumst við í hendur og urðum strax vinir aftur. Svo til­finningin sem maður finnur eftir æfingar, þessi vel­líðunar­til­finning, ég hef ekki kynnst öðru eins áður.“

Varð seint stressaður

Og ekki er hægt að segja að Logi hafi verið stressaður fyrir fruma­un sinni í MMA á Norður­landa­meistara­mótinu á dögunum. Logi bjó yfir stóískri ró sem er nú eitt af ein­kennis­merkjum eins af þjálfurum hans, UFC bar­daga­kappanum Gunnari Nel­son sem var í horni Loga á Norður­landa­meistara­mótinu á­samt aðal­þjálfaranum Luka Jelcic.

„Áður en að ég hélt á mótið voru æfinga­fé­lagarnir búnir að segja við mig að ég ætti að vera stressaður fyrir bar­dagann. Þá sér­stak­lega þegar að ég væri að ganga að bar­daga­búrinu en þá var ég bara að hlusta á tón­listina. Eina skiptið sem ég fann fyrir ein­hverju stressi var rétt fyrir bar­dagann þegar að ég horfði á and­stæðinginn minn inn í búrinu.“

Logi vann yfir­burðar­sigur á and­stæðingi sínum og tryggði sér þar með Norður­landa­meistara­titilinn í MMA.

„Hann var mjög langur, and­stæðingur minn, og ég vildi því helst ekki fara í standandi bar­daga á móti honum. Mér fannst ég finna það á honum að hann væri betri en ég í að boxa. Þá vildi ég frekar skjóta mér inn fyrir hans varnir og glíma við hann í gólfinu. Þar líður mér vel. Þar er minn bak­grunnur.

Ég kom honum í golfið. Reyndi að kyrkja hann og þar með þvinga fram stöðvun á bar­daganum. Það tókst því miður ekki en ég náði að lenda nokkrum góðum höggum í gólfinu og tryggði mér á endanum dómara­úr­skurðinn.“

Luka Jelcic og Gunnar Nel­son voru Loga til halds og trausts í bar­daganum.

Það að vera með þessa tvo í sínu horni hlýtur að hafa róandi á­hrif?

„Að sjálf­sögðu. Þeir standa þétt við bakið á mér. Luka þjálfarar okkur á hverjum einasta degi hér í Mjölni og leggur sig fram við að hjálpa okkur að verða betri. Það er númer eitt, tvö og þrjú hjá honum. Þá mætir Gunnar reglu­lega á æfingar hjá okkur, æfir oft með okkur og ég trúi því eigin­lega ekki enn þá að hann sé að gera það.“

Hann getur gert allt

Logi er einn margra efni­legra MMA bar­daga­kappa sem æfa hjá Mjölni og kom hann Gunnari Nel­son skemmti­lega á ó­vart.

„Þetta er náttúru­lega bara frá­bært hjá honum,“ segir Gunnar um frum­raun Loga í bar­daga­búrinu. „Hann er að stíga þarna inn í fyrsta skipti en það sem að ég sá þetta kvöld í Dan­mörku er þaul­reyndur keppnis­maður miðað við aldur. Logi er ekki nema ní­tján ára gamall. Hann hefur keppt mikið í glímu hér á landi sem og er­lendis, svo var hann mjög efni­legur í körfu­bolta á sínum tíma.

Hann kann að æfa sem og keppa. Maður veit hins vegar aldrei hvort menn séu gerðir fyrir MMA fyrr en þeir stíga inn í bar­daga­búrið. Logi kom heldur betur á ó­vart í frum­raun sinni þar og greip gæsina þegar að hún gafst.“

Þú segir að hann hafi komið þér á ó­vart. Hvað er það sem þú tókst eftir hjá honum?

„Miðað við að vera stíga inn í bar­daga­búrið í fyrsta skipti fannst mér hann beittur. Hann var fljótur að koma sér í gírinn. Þegar að þú ert kominn á þetta efsta stig í MMA. Þar sem að menn eru að reyna slá þig af al­efli. Stig þar sem að adrena­línið er með í för, þarftu að geta stillt þig, róað þig og beitt allri þinni kunn­áttu án þess að vera þvæla það fyrir þér. Mér fannst Logi gera þetta frá­bær­lega. Að ná svona miklum fókus í það sem að var hans frum­raun. Hann getur gert allt. Ég veit allt um það. En að geta gert það undir þessu á­lagi. Í fyrsta skipti. Það sýnir að hann er keppnis­maður“

Næsta kynslóð að koma upp: „Verður töluvert betri en ég“

Eins og áður segir eru margir efni­legir bar­daga­kappar að koma í gegnum starf Mjölnis.

„Logi er einn af þeim. Hann hefur verið að æfa hjá okkur síðan að hann var krakki. Núna erum við að sjá þessa nýju kyn­slóð bar­daga­kappa hjá okkur. Kyn­slóðin sem er búin að alast upp í þessu. Sú kyn­slóð verður tölu­vert betri en ég var nokkurn tímann.“

En vill Logi sjálfur eiga feril í MMA?

„Ég ætla að spila þetta eftir eyranu,“ svarar Logi. „Ef tæki­færin bjóðast þá mun ég stökkva á þau. Ég vil miklu frekar eiga feril í MMA heldur en að vinna eitt­hvað skrif­stofu­starf.“