„Þetta er fyrsta skiptið mitt. Ég hef alltaf ætlað að koma og alltaf langað að prófa að koma og ákveð að núna þar sem þetta er seinasta skiptið þá verð ég að nýta tækifærið til að gera það,“ segir Birta Björg Heiðarsdóttir, gestur á hátíðinni.

Gunnar Ingi Jones húðflúrari er búinn að vera á Seyðisfirði í tæplega viku og hefur verið önnum kafinn við það að húðflúra fólk.

„Já, það er búið að vera alveg nóg að gera. Þetta eru búnir að vera langir dagar, yfirleitt mætt svona kannski tíu á morgnanna og erum að slefa heim svona ellefu, tólf á kvöldin. Þetta er bara búið að vera mjög næs.“

Birta Björg hefði viljað koma aftur á Lunga á næsta ári ætti hún þess kost og dvelja alla vikuna á Seyðisfirði.

„Af því að ég kom hérna í gær og það var geðveikt mikið af skemmtilegu í boði. Ég hefði alveg verið til í að prófa meira og sjá meira.“

Leggur til að Punga taki við

Gunnar Ingi segir skemmtilegt að koma einu sinni á Lunga og fá að húðflúra fólk áður en hún hættir.

„En vissulega mjög leiðinlegt. Kemur ekki bara eitthvað nýtt eftir þetta? Punga?“

Kristín Sesselja Einarsdóttir tónlistarkona er hluti af stórum hópi listafólks sem fram kemur á hátíðinni í ár. Hún hefur áður komið á Lunga, árið 2019, en þá kom hún til að læra.

„Ég var búin að vera að semja tónlist í einhver ár en ég vissi ekki hvernig ég ætti að koma þessu á næsta stig og fór á Lunga í svona verksmiðju, lærði á [tónlistarhugbúnaðinn] Ableton og svo er ég að loka hringnum núna með því að spila á Lunga, það er mjög sérstakt.“

Hún sé leið yfir því að þetta verði í seinasta skiptið sem hátíðin Lunga verður haldin.

Vill ekki fara aftur heim

Paul Anton Jean André Le Boterff kom alla leið frá Bandaríkjunum til að upplifa hátíðina með íslenskum vinum sínum. Hann lofar Seyðisfjörð en furðar sig á skemmtiferðarskipunum þar. „Þetta er magnað, virkilega fallegt. Skipin eru svolítið fáranleg en þetta er fáranlegt land, á góðan hátt,“ segir Paul sem langar ekki að fara aftur heim til sín.

„Það kom upp vandamál í gær þegar ég var að horfa á sólarupprásina, þá hugsaði ég með mér að mig langar ekki að fara aftur til Los Angeles, það er glataður staður.“

Hugi Ólafsson, einn af vinum Pauls, segir að stemningin sé búin að vera góð. „Smá rigning en það stoppar okkur ekki. Frábær kveðjuhátíð, góð stemning í fólki, bara eins og það á að vera.“