Hvar eru Illugi Jökuls, Hall­grímur Helga, Atli Þór Fanndal?

Brynjar skrifar viðhorfspistil á Vísi þar sem hann hefur leik á að tala um fréttaskýringu Maríu Sigrúnar Hilmisdóttur fréttamanns RÚV sem hann segir vel unna en yfirstjórn RÚV hafi neitað að birta umfjöllunina.

„Þótti fréttaskýringin svo illa unnin að ekki voru önnur ráð en að reka fréttamanninn með áður óþekktum skætingi og niðurlægingu. Yfirstjórn RÚV hefur ekki enn fært nokkur rök fyrir skorti á fagmennsku og vankunnáttu fréttamannsins í rannsóknarblaðamennsku, sem mun vera skýringin á brottrekstrinum og að umfjöllunin var ekki birt á Kveik.“

Brynjar segir einkum tvær spurningar brenna á almenningi: „Annars vegar hvers vegna borgaryfirvöld afhenda þessi gæði til olíufélaganna endurgjaldslaust að því virðist og hins vegar af hverju yfirstjórn RÚV reynir að þagga niður umfjöllun um málið í Kveik.“

Dagur og Dóra Björt úti í móa

Brynjar segir Dag B. Eggertsson fyrrverandi borgarstjóra hafa litlu getað svarað og almenningur litlu nær „um þennan gjafagjörning af hálfu borgarinnar. Ekki batnaði málflutningur borgarstjórans fyrrverandi eftir að umfjöllunin birtist í Kastljósi, sem var meira og minna skítkast í garð fréttamannsins í stað þess að rökstyðja þennan gjörning.“

Brynjar segir Dag hafa þann sjaldgæfa eiginleika að geta látið dæluna ganga endalaust þó bensínið sé búið. Og ekki batnaði Birni þegar Dóra Björt Guðjónsdóttir, formaður umhverfis- og skipulagsráðs borgarinnar blandaði sér í umræðuna. Framganga RÚV sé svo til þess fallin að vekja bæði furðu og tortryggni.

„Yfirstjórn RÚV hefur tekið þann pól í hæðina að reyna þegja málið í hel. Menn hafa leitað skýringa og bent á hagsmunatengsl yfirstjórnar RÚV og meirihlutans í borginni og pólitísks samkrulls þar á milli. Hvað sem því líður er til merkileg skýrsla ríkisendurskoðanda frá 2019 um opinbera hlutafélagið RÚV ohf. Fyrir utan umfjöllun um óráðsíu í rekstrinum, ógjaldfærni og ósjálfbærni er fjallað um gjafagjörning borgarinnar til RÚV er snertir lóðina í Efstaleiti, sem nam um einum og hálfum milljarði 2015 á verðlagi þess tíma.“

Hvar eru spillingarsérfræðingar okkar?

Brynjar lýsir í lok pistils síns sérstaklega eftir því sem hann kallar „okkar helstu spillingarsérfræðinga vekur ekki síður furðu. Ekkert hefur heyrst í Illuga Jökuls, Hallgrími Helga, Atla Þór Fanndal, sem var lengi hjá samtökum sem barðist gegn spillingu, eða Þorvaldi Gylfasyni, sem gjarnan kveða upp dóma um spillingu með upphrópunum án þess að þekkja nokkuð til mála. Læðist að manni sá grunur að þessir sérfræðingar í spillingu annarra hafi ekki nokkurn áhuga á spillingu yfirhöfuð nema þegar umræðan gagnist þeim í pólitískum tilgangi.“

Brynjar segir að ef annar meirihluti væri við stjórn borgarinnar á þessum tíma væru þessi menn búnir að krefjast óháðrar rannsóknarnefndar og jafnvel lögreglurannsóknar. „Verst er að útvarpið í almannaþágu skuli vera í aðalhlutverki í þessu leikriti.“