Ætlar hvorki að hætta að vinna né opna kaffi­hús

Snorri heldur úti hlaðvarpinu Skoðanabræður með bróður sínum Bergþóri Mássyni.  Nýjasti þátturinn og umræður í honum hafa vakið mikla athygli. Gestur þeirra bræðra í þættinum var Patrik Atlason, eða Prettyboitjokkó. Þar ræddu þeir þrír um hlutverk kynjanna í tengslum við kapítalisma og sagði Patrik að hans mati ættu karlar að vera með peningaáhyggjur á meðan konur gætu verið heima með börnin.

Æðsta markmið að vera fyrirvinna

Þessum pælingum Patriks svaraði Snorri á þessa leið: „Ég hugsa líka að allir karlar, óháð því að auðvitað eru bara bæði kynin frábær í allskonar störfum og mjög góð í allskonar drasli, en allir karlar myndu vilja geta haldið uppi heimili sínu án þess að konan þyrfti að vinna. Að sjálfsögðu myndu þeir vilja það,“ sagði Snorri og að hjá mörgum körlum væri það þeirra æðsta markmið.

Bergþór tók þá við orðinu og sagði: „Já maður, hún eitthvað í Pilates.“ segir Bergþór þá og Snorri bætir við: „Hún getur stofnað kaffihús“.

Nadine gefur ekki mikið fyrir þessar tillögur. Þessi orð Snorra séu auk þess hluti af gríni sem gangi þeirra á milli.

„Við Snorri höfum sent á milli okkar meme af TikTok þar sem ungir gaurar sem eru augljóslega ekki búnir að meika það fjárhagslega segjast samt vera að vinna af sér rassgatið og stofna stórfyrirtæki, til þess að konan geti áhyggjulaust stofnað sitt kaffihús ef hún vill. Þannig að það er ákveðið grín í gangi þar,“ segir hún.

Hún segir það á sama tíma „algjört rugl“ að taka undir sjónarmið Patriks um að konan eigi bara að vera heima. Þar sé hún ekki sammála.

Ætlar ekki að hætta að vinna

„Hann alla vega hvetur mig til dáða sem ætla mér stóra hluti í atvinnulífinu. Ég hef alltaf verið mjög vinnusöm manneskja, alltaf unnið mikið. Það hefur aldrei staðið til að breyta því enda fæ ég mikið út úr mínum störfum. Fólk þarf auðvitað bara að taka sínar ákvarðanir út frá störfum og hag og vera frjálst að gera það sem það vill á sínum forsendum,“ segir Nadine.

Hún segir það svo aðra pælingu hvað hún eða hann myndu gera ef þau væru milljarðamæringar.

„Það er auðvitað rómantísk pæling. En við erum ekki þar og Snorri ber ábyrgð á því. Hann er blaðamaður. Þar fyrir utan stunda ég lyftingar, ekki pilates,“ segir Nadine og skýtur létt á Bergþór.

Jöfn í uppeldi og heimilisstörfum

Um umræðuna í þættinum um hlutverk kynjanna segist hún skynja að mögulega sé um „eitthvað pönk“.

„ Heimilislífið hjá okkur er tiltölulega jafnt skipt, myndi ég segja. Að konan eigi að hugsa um börnin er líklega eitthvað pönk, enda erum við alveg jöfn í barnauppeldinu. Ég bý við þann veruleika að það eru ýmsar misgáfulegar pælingar látnar flakka í hlaðvarpsþáttum Snorra og bróður hans Bergþórs. Að vísu er þarna punktur um að nú þurfi báðir aðilar að vera útivinnandi til að láta hlutina ganga upp sem er svona einhver umræða um kapítalismann í nútímanum. Mér finnst alveg vert að ræða það, ekki að það þýði endilega að það sé konan sem ætti þá að vera heima,“ segir hún svo á alvarlegri nótum.

Hún segir þau Snorra rökræða mjög mikið. Umræðurnar geti orðið skrautlegar. Hann sé áberandi í opinberri umræðu og hún sé meðvituð um að fólk hafi misjafna skoðun á honum. 

„En ég tek lífinu ekki mjög alvarlega og hef á vissan hátt gaman að þessu öllu saman. Það má segja að Snorri sé kominn á bragðið með að ögra fólki og mér líður eins og hann sé aldrei í eins góðu skapi og þegar allir eru brjálaðir út í hann. Ætli það venjist ekki eins og annað.“