Segir borgar­stjóra óttalegan vettling

Borgarstjórnarfulltrúar Sjálfstæðisflokksins komu 1.600 vettlingum fyrir í Tjarnasal ráðhússins í gær, en svipaður fjöldi barna bíður eftir leikskólaplássi í Reykjavík. Uppátækið átti meðal annars að minna borgarstjóra á leikskólavandann. Hildur sagði Sjálfstæðisflokkinn lengi hafa vakið athygli á fyrirhyggjuleysi meirihlutans í þessum málaflokki. 

Einar Þorsteinsson Borgarstjóri sagði svo að Sjálfstæðisflokkurinn væri með þessu að kvelja barnafólk sem bíði eftir leikskólaplássi, og að gjörningurinn geri lítið úr þeim vanda sem fólkið glímir við. Þetta væri einnig „vitleysa“ því börnin 1.600 væru ekki á biðlista heldur væru þetta umsóknir. Borgin væri í umsóknarferli og það væri hægt að tala um biðlista þegar ferlinu lyki.

Þá voru leikskólakennarar einnig ósáttir við gjörninginn, en stjórn félags leikskólakennara tók ekki undir yfirlýsingar Sjálfstæðisflokksins þar sem boðaðar voru „skyndilausnir sem engu skila“. Stjórn Félags leikskólakennara vildi að rætt yrði um það sem skiptir öllu máli, að fjölga kennurum á leikskólastiginu.

Tekur undir með Félagi leikskólakennara

Hildur Björnsdóttir segir í tilkynningu til fréttastofu að vettlingarnir hafi ekki átt að vera innlegg í kjarabaráttu leikskólakennara. „Ég tek heilshugar undir með Félagi leikskólakennara hvað varðar mikilvægi þess að skólastarf í leikskólum verði endurskipulagt, ég vakti raunar máls á því í borgarstjórn fyrr í mánuðinum,“ segir Hildur. Hún segir Sjálfstæðisflokkinn hafa hugsað út fyrir boxið og kynnt fjölbreyttar lausnir á borð við daggæslu á vinnustað, heimgreiðslur og aukinn stuðning við sjálfstætt starfandi leikskóla. 

Hún segir fjölmargt hafa verið gert til að bregðast við ákalli leikskólakennara eftir betra starfsumhverfi. Hún nefnir að leikskólaplássum hafi verið fækkað um 500 með einu pennastriki árið 2018 til að bregðast við ákalli leikskólakennara eftir færri börnum á hvern starfsmann. Opnunartími leikskólanna hafi verið styttur að kröfu leikskólakennara og vistunartími barna skertur. Svo hafi Reykjavíkurborg jafnframt tryggt rausnarlegri kjarasamninga við leikskólakennara en önnur sveitarfélög. Fjallað var um kjaramál leikskólakennara á Vísi í dag. Hildur segir þessar aðgerðir því miður ekki hafa skilað þeim árangri sem að var stefnt, og lausn biðlistavandans sé hvergi í sjónmáli.

„Raunveruleikinn er auðvitað sá að þessir herramenn sem hafa deilt með sér borgarstjórastólnum hafa ekki sýnt leikskóla- og daggæslumálum nokkurn áhuga. Þetta er auðvitað stærsta jafnréttismálið sem sveitastjórnarstigið fæst við,“ segir Hildur. Hún segir að borgarstjóri hafi reynst óttalegur vettlingur og lítið hafi áunnist á hans vakt. Hún segist vera virkilega ánægð með gjörninginn og telur hann hafa verið vel heppnaðann. Honum hafi verið ætlað að kalla fram umræðu um leikskóla- og daggæslumál í borginni og það hafi tekist.