„Við höfum ekki séð svona áður“

Streymi gærdagsins byrjaði brösuglega vegna vinda og snjókomu og lýsir Ísak því sem „harki“. Þegar leið á kvöldið skánaði veðrið og síðar byrjaði hraunið að flæða í námuna. Fyrst vildi Ísak fylgjast með hrauni sem flætt hafði yfir veg sem notaður hefur verið til að komast að eldstöðvunum.

„Við sáum allt,“ segir Ísak í samtali við Vísi. Hann fylgdist með því þegar jarðýtum var ekið yfir hraunið eftir að leka fór yfir varnargarðanna og seinna þegar hann sá hraunið stefna að námunni færði hann sig um set.

Streymi Ísaks í gær var um fimm klukkustunda langt og þegar mest var horfðu fleiri en tíu þúsund manns á það á Youtube og á sama tíma um fimm þúsund manns á X (áður Twitter).

„Fólk læstist í streyminu. Við höfum ekki séð svona áður.“

Ísak segir jákvætt að hann hafi tök á því að fanga eldgosið með þessum hætti. Hann sé með tímastimpla á upptökunum og sé í raun að skrásetja eldgosið.

Streymið hjá Ísak slitnaði í gær og má sjá báða hluta þess hér að neðan. Hraunið byrjaði að renna niður í námuna klukkan sjö í gærkvöldi en tímann má sjá niðri til hægri á myndbandi Ísaks.

Þegar gosið var byrjað að renna í námuna sat Ísak í bíl sínum rétt við námuna og segist hann hafa fundið fyrir hitanum þegar hann opnaði gluggann.

„Í fyrri gosum gat maður verið nær þeim en það hefur ekki verið í boði núna,“ segir Ísak. Hann segir aðstæður í gær hafa verið góðar. Hraunið hafi flætt í námuna og hann hafi verið undan vindi. Hann var þó með gasmæla og annan öryggisbúnað.

Flaug í gegnum hraun

Ísak segir gærkvöldið standa að miklu leyti uppúr þegar hann hugsar um fyrri streymi sín frá eldgosum. Hann minnist þess einnig þegar hann fangaði fyrsta dag eldgossins við Litla-Hrút í júlí í fyrra. Þá hafi rúmlega tíu þúsund manns horft á þegar mest var, enda hafi hann nánast einn að sýna frá gosinu þann dag.

Annar dagur sem tengist sama eldgosi stendur einnig upp úr en þá flaug Ísak svokölluðum „fyrstu persónu dróna“ í gegnum hraun sem skvettist upp úr gígnum við Litla-Hrút.

Þá slitnaði sambandið við drónann og Ísak taldi sig hafa tapað honum. Hann sneri þó aftur á sjálfstýringu Ísak tog voru hlutar hans brotnir og gúmmí á vírum bráðnað.

Ísak tapaði sínum fyrsta dróna á miðvikudaginn. Sá lenti í miklum vindi yfir hrauninu og og lenti á hættusvæði, svo Ísak gat ekki náð í hann.

Fékk samviskubit erlendis

Þegar litið er til þess hvort hann ætli að halda áfram að streyma frá eldgosum segir hann ekkert annað koma til greina.

„Þegar það er gos þarf maður að skila af sér efni.“

Ísak var í Taílandi þegar eldgosið varð í febrúar og segist hafa fengið samviskubit.

„Fólk sér myndir og slíkt en svona myndefni gefur miklu meira, fyrir þá sem vilja horfa á svona langt efni,“ segir Ísak. Hann segist eingöngu vilja sýna frá eldgosum eins og þau eru, án alls hræðsluáróðurs eða slíks.

„Ég vil bara sýna þetta eins og þetta gerist,“ segir Ísak.