Lék lengi á Eng­landi en er nú fram­kvæmda­stjóri lands­liðs sem hefur aldrei spilað

Kitson gerði garðinn frægan með Reading þar sem hann lék með Brynjari Birni Gunnarssyni, þaðan fór hann til Stoke City – sem hefur gríðarlegar Íslendinga tengingar – og svo Portsmouth þar sem hann lék með Hermanni Hreiðarssyni. Alls lék hann 81 leik í ensku úrvalsdeildinni og 155 í ensku B-deildinni.

Á fimmtudag var tilkynnt að hann væri tekinn við landsliði Nauru. Um er að ræða smáríki í Eyjaálfu þar sem rétt rúmlega tíu þúsund manns búa.

Á vef knattspyrnusambands eyjunnar segir að sambandið sé gríðarlega ánægt að tilkynna ráðningu Kitson sem bæði landsliðsþjálfara sem og sendiherra eyjunnar. Kitson mun vinna náið með öðrum Englending, Charlie Pomroy, en sá verður landsliðsþjálfari Nauru.

Nauru ætlar sér stóra, allavega stærri, hluti í knattspyrnuheiminum en landið hefur til þessa ekki verið með starfandi landslið. Nú er planið að spila við Amerísku-Samóaeyjarnar sem og að stofna smáríkjasamband í Eyjaálfu með Kiribati, Micronesiu, Palau, Tuvalu og Marshalleyjum.