Innlent

Seðla­banka­stjóri segir ó­heppi­legt að beita vöxtum gegn hús­næðis­skorti

Heimir Már Pétursson skrifar
Ásgeir Jónsson seðlabankastjóri segir að nú séu viðkvæmir tímar varðandi þróun efnahagsmála. En ef vel takist til við gerð kjarasamninga til nokkurra ára og sveitarfélögin haldi aftur af sér með gjaldskrárhækkanir, gæti dregið hratt úr verðbólgunni.
Ásgeir Jónsson seðlabankastjóri segir að nú séu viðkvæmir tímar varðandi þróun efnahagsmála. En ef vel takist til við gerð kjarasamninga til nokkurra ára og sveitarfélögin haldi aftur af sér með gjaldskrárhækkanir, gæti dregið hratt úr verðbólgunni. Stöð 2/Ívar Fannar

Seðlabankastjóri fagnar viðbrögðum Reykjavíkurborgar við kröfu verkalýðshreyfingarinnar um að dregið verði úr fyrirhuguðum gjaldskrárhækkunum. Nú skipti öllu máli að samstaða náist um að koma verðbólgunni hratt niður.

Skýr merki eru um að dregið hafi úr umsvifum í hagkerfinu. Ásgeir Jónsson seðlabankastjóri segir þetta til marks um að vaxtahækkanir og breytingar á lánareglum væru að skila árangri í baráttunni við verðbólguna.

Finnbjörn A. Hermannsson forseti ASÍ og Sigríður Margrét Oddsóttir framkvæmdastjóri Samtaka atvinnulífsins voru sammála í Pallborðinu í gær um mikilvægi þess að gera langtíma kjarasaminga sem tryggi kaupmátt og vinni gegn verðbólgunni.Vísir/Vilhelm

„Ef við náum því marki að geta hægt á kerfinu og náð að knýja fram mjúka lendingu, án þess að það komi eitthvað upp í fjármálakerfinu, þá er það mjög jákvætt,“ segir Ásgeir.

Verkalýðshreyfingin gengur sameinuð til viðræðna um nýja langtíma kjarasamninga og kallar eftir því að sveitarfélögin dragi verulega úr fyrirhuguðum gjaldskrárhækkunum á bilinu 5 til 30 prósent á næsta ári. Einar Þorsteinsson formaður borgarráðs brást við þessu ákalli á fimmtudag í síðustu viku.

„Það sem skiptir mestu máli er að aðilar vinnumarkaðarins nái hófsömum kjarasamningum með það að markmiði að ná verðstöðugleika í landinu. Ef það tekst þá er Reykjavíkurborg tilbúin að axla ábyrgð og draga úr þessum breytingum á gjaldskrám,“ sagði Einar.

Seðlabankastjóri fagnar þessum viðbrögðum.

„Það sem við náttúrlega óttuðumst og sem kom fram í síðustu útgáfu Peningamála, er að verðbólga haldi áfram jafnvel þótt hagkerfið kólni og hagvöxtur minnki. Að þessi skriða stoppi ekki,“ segir seðlabankastjóri. Þess vegna væri ánægjulegt að heyra þann tón sem nú bærist frá sameinaðri verkalýðshreyfingu og Samtökum atvinnulífsins.

Nýjasta spá Seðlabankans gerir ráð fyrir að verðbólgan verði þrálátari en áður var spáð og verði um 5 prósent á næsta ári.  Seðlabankastjóri segir hins vegar að ef vel takist til gæti verðbólgan hjaðnað hraðar.

Einar Þorsteinsson formaður borgarráðs og verðandi borgarstjóri um næstu áramót, segir borgina tilbúna til að draga úr gjaldskrárhækkunum náist kjarasamningar sem vinni gegn verðbólgunni. Stöð 2/Ívar Fannar

„Verðbólga sýnir merki um að hún sé farin að gefa eftir, bæði hér og erlendis. Nú skiptir öllu máli að við stígum rétt skref til að við getum náð mjúkri lendingu,“ segir Ásgeir. Án þess að það leiði til samdráttar.

Þegar gerðir væru kjarasamningar til langs tíma þyrfti ekki allt að gerast á fyrsta árinu. Uppbygging húsnæðis tæki til dæmis lengri tíma. Það væri aftur á móti ánægjulegt að verkalýðshreyfingin legði áherslu á að fleira en launin skipti máli fyrir hag heimilanna, eins og aðgengi að húsnæði. Skortur á húsnæði ætti stóran þátt verðbólgunni.

„Og í sjálfu sér óheppilegt að við séum í rauninni að beita vöxtum sem viðbragði við húsnæðisskorti. Það er ekki alveg heppilegt,“ segir Ásgeir Jónsson.

Seðlabankinn Kjaramál Húsnæðismál

Tengdar fréttir

Seðlabankastjóri ánægður með tóninn í kjaraviðræðum

Seðlabankastjóri segir minnkandi einkaneyslu og fjárfestingar og versnandi fjármálaskilyrði sýna að aðgerðir bankans til að draga úr verðbólgu væru að virka. Mjög jákvæður tónn berist nú frá aðilum vinnumarkaðarins varðandi nýja kjarasamninga sem geti leitt til þess að hraðar dragi úr verðbólgu.

Forystufólk ASÍ og SA segir alla þurfa að leggjast á eitt

Forystufólk Alþýðusambandsins og Samtaka atvinnulífsins er sammála um að gera eigi nýja langtíma kjarasamninga sem skapi stöðugleika og stuðli að hjöðnun verðbólgu og lækkun vaxta. Nú eru átta vikur þar til gildandi skammtíma kjarasamningar á almennum vinnumarkaði renna út.

Ríkið verði að sýna á spilin

Sigríður Margrét Oddsdóttir framkvæmdastjóra SA og Finnbjörn A. Hermannsson forseti ASÍ mættust í Pallborði Vísis og fóru yfir komandi samnininga.

Afdrifaríkar átta vikur framundan

Það ræðst á næstu átta vikum hvort aðilum vinnumarkaðarins tekst að koma á nýjum langtíma kjarasamningum sem duga til að keyra niður verðbólguna. Ef ekki tekst að fá ríki, sveitarfélög og fyrirtæki til að sameinast um þetta markmið má reikna með að verðbólga verði áfram mikil og jafnvel aukist. 

Reykjavíkurborg tilbúin að draga úr hækkunum

Formaður borgarráðs Reykjavíkur segir að borgin sé tilbúin til þess að draga úr boðuðum gjaldskrárhækknum, að því gefnu að aðilar vinnumarkaðar nái saman um hóflegar launahækkanir.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið