Þetta er Purrkur Pillnikk

„Við vissum í raun ekki við hverju við ættum að búast af okkur. Við vorum með hugmynd að við vildum ekki vera að reyna að vera 18-19 ára og endurlifa eitthvað. Við erum eldri og það er staðreynd sem við getum ekki litið fram hjá. Þess vegna vildum við vera Purrkur Pillnikk anno 2023,“ segir Einar Örn söngvari og talsmaður hljómsveitarinnar.

Safnið ber hið dramatíska heiti Orð fyrir dauða. Um er að ræða Fimm 1180 gramma vínilplötur og 48 síðna bókling í einum kassa þannig að um er að ræða veglegan pakka. Eldri plötur hafa verið er-masteraðar en að auki er að finna áður óútgefið tónleika- og æfingaefni. Og það sem sætir ef til vill mestum tíðindum: Síðustu fimm lög Purrksins sem samin voru fyrir lokatónleikana sem fram fóru á Melavelli í ágúst 1982. Þau eru í pakkanum.

Voru ekki að herma eftir sjálfum sér

Einar Örn sem og aðrir meðlimir Purrksins lítur svo á að hinar nýju upptökur á Orðum fyrir dauða séu frumútgáfur þessara fimm laga, enda voru þau vart tilbúin í ágúst 1982, þá rétt nýsamin. Hugmyndin var að láta þau hljóma eins og þau væru samin „í gær“, enda hafa þau lifað í huga Purrksins í gegnum árin sem slík. Þeir Purrksmenn þurrkuðu því rykið af hljóðfærum sínum og drifu sig í hljóðver.

„Ekki til að hjakka heldur halda áfram. Og það held ég að hafi tekist við upptökur. Við vorum ekki að reyna að herma eftir okkur, heldur vorum við við.“

Með aðkomu Örlygs Steinars og upptökustjórans Alberts Finnbogasonar telur hljómsveitin sig hafa gefið þessari tónlist algerlega nýtt líf, og í raun endurskapað hana. Upptökurnar voru gerðar í hljóðverinu Sundlaugin í maí 2023.

Í Purrki Pillnikk voru þeir Einar Örn, rithöfundarnir Bragi Ólafsson, Friðrik Erlingsson og Ásgeir Ragnar Bragason, en Ásgeir féll frá 2015.

„Því fengum við til liðs við okkur Sigtrygg Baldursson en hann spilaði með Purrki Pillnikk síðast 1985 og hefur því verið í Purrki Pillnikk um nokkurra ára skeið.“

Kom á óvart hversu góðir þeir voru

Einar Örn segir að áður en þeir fóru í hljóðverið hafi þeir haft af því áhyggjur að vera stirðir og ryðgaðir.

„En þær áhyggjur reyndust algerlega úr lausi lofti gripnar. Við gátum og getum ekki annað en brosað yfir því hvað við erum í raun góðir. Og það eina sem við höfðum gleymt voru gallarnir þannig að við erum perfekt. Ég hef okkur grunaða alla um að hafa undirbúið okkur undir þann möguleika að fara saman í hljóðver og ljúka því sem ólokið var, og það var að taka upp Orð fyrir dauða.“

Lengi lifir í gömlum glæðum. Er pönkið að rísa úr öskustó?

„Ég er ekkert endilega viss um að við séum að rísa upp. Í gegnum árin hef ég heyrt í fólki sem segir mér hvað Purrkur Pillnikk skipti það miklu máli. Vægi okkar virðist vera þó nokkuð í dægumenningunni. Mér þykir vænt um það. Það er líka ein af ástæðum fyrir því að vilja taka saman allt sem við gáfum út og reyndar höfum ekki gefið út, og setja á sama stað.“

Einar Örn segir þetta hafa verið heljarinnar mikla vinnu allt síðan í maí. Mikið grúskað og grafið til að fá sem gleggsta mynd.

Bragi heyrði eitthvað á kassettu

„Síðan er ég spurður, eru ekki tónleikar? Þá er svarið, nei. Við viljum fyrst koma þessu frá okkur. En við spilum litla tónleika á útgáfudaginn á laugardaginn í Smekkleysu Plötubúð,“ segir Einar Örn.

En myndirðu þá segja að þetta sé punkturinn fyrir aftan Purrkinn?

„Ég get ekki sagt að þetta sé punkturinn fyrir aftan Purrk Pillnikk. Bragi á núna bassa og ég reyndar líka. Friðrik á gítar og Sigtryggur trommur. Í grúski okkar heyrði Bragi eitthvað á kassettu og hans viðkvæði var að það þyrfti að halda áfram með þetta og festa á band.“

Þannig að hljómsveitin gæti þess vegna haldið áfram. Mig langar að spyrja eins og Magnús Hlynur, er ekki alveg viss um að ég ráði við það en læt vaða: Er gaman að vera í hljómsveit?

„Ég var í hljóðverinu og við allir vorum þar. Ég horfði á þá og fann að þetta voru vinir mínir, Og ég var alltaf til í að vera áfram með þeim og gera hvað sem er. Þetta er Purrkur Pillnikk.“