„Margir góðir vinir mínir búa enn í Grinda­vík eða eiga fjöl­skyldu þar“

„Margir góðir vinir mínir búa enn í Grindavík eða eiga fjölskyldu þar. Sama með vinafólk fjölskyldu minnar og foreldra. Þetta er náttúrulega, maður hefur aldrei upplifað annað eins. Og þau náttúrulega eru að upplifa þetta. Þetta er skrítin staða, allir að bíða eftir að eitthvað gerist.“

„Ég sendi mínar baráttukveðjur og hugur minn er hjá fólkinu í Grindavík. Vonandi að, maður veit ekki hvað maður á að vona, allavega að þau fái lausn á sínum málum sem fyrst fyrir þennan fallega bæ sem Grindavík er,“ sagði Alfreð en hvað leik gærkvöldsins varðar þá var Alfreð nokkuð brattur þrátt fyrir tap.

„Ég held það sé ekki spurning að það megi finna mjög margt jákvætt. Erum að spila á móti liði sem getur unnið hvert einasta stórmót og við vitum hvernig leikmyndin verður. Þeir verða mjög mikið með boltann og svo þurfum við að gera sem best úr þeim stöðum þegar við fáum boltann.“

„Eina svekkelsið í fyrri hálfleik var að við vorum með ágætis stöður en síðasta sendingin var ef til vill ekki rétt því það var mikið pláss fyrir aftan þá þegar við unnum boltann. Við náðum kannski ekki að nýta það nægilega vel. Vorum lengi í lágri blokk og vorum að gera það mjög fagmannlega eins og við þekkjum og kunnum. Svo eru þeir með það mikil gæði að þeir náðu að brjóta okkur á bak aftur tvisvar.“

„Þegar þú spilar sem framherji fyrir íslenska landsliðið þá er varnarvinnan oftar en ekki það mikilvægasta, og hefur verið í gegnum árin. Maður er vanur því og við vissum hvernig sviðsmyndin var í leiknum á móti Portúgal heima á Íslandi og við vildum fá alveg eins leik.“

„Vissum að þeir myndu vera mikið með boltann og tvö- eða þrefalda á kantana. Það er mjög erfitt og krefjandi að gera það í 90 mínútur því þeir eru það góðir og með það marga hágæða leikmenn. Við sofnum kannski í hálfa sekúndu og þá komast þeir í dauðafæri, þetta er gríðarlega erfitt en heilt yfir miklar framfarir frá síðasta leik. Frammistaðan var í fínu lagi fannst mér.“

Að lokum var Alfreð spurður út í umspilið og hvernig sá möguleiki leggist í hann.

„Held að við getum sótt grunninn í leikjum eins og þessu, eins og Slóvakíu og Portúgal heima þar sem varnarvinnan er upp á 10. Erum að vinna og verjast sem lið. Það mun alltaf vera grunnurinn fyrir okkur. Svo erum við með gæði og sköpum okkur færi í þessum leikjum, sköpuðum nokkur í seinni hálfleik og eitt skot frá Arnóri (Sigurðssyni) í fyrri hálfleik.“

„Þurfum að finna þessa blöndu, vita nokkurn veginn hvað er okkar einkenni og vinna nánar í því. Höfum ekki mikinn tíma, enginn leikur þar sem við erum allir saman fram í mars og vonandi að við séum í þessu umspili, maður veit ekki alveg hvernig staðan er á því.“