„Ég var að velta fyrir mér hver væri liturinn á undir­fötunum þínum“

Luis Rubiales hefur verið í sviðsljósinu eftir að Spánn tryggði sér heimsmeistaratitil kvenna í knattspyrnu á sunnudaginn. Eftir leikinn sást hann kyssa leikmann Jennifer Hermoso liðsins á munninn þegar hann óskaði henni til hamingju með sigurinn. Hann baðst á endanum afsökunar eftir að hafa áður gert lítið úr atvikinu.

Þá sást hann einnig grípa um klof sitt í stúkunni þegar hann fagnaði sigrinum, nánast fyrir framan nefið á spænsku konungsfjölskyldunni.

Spænsk knattspyrnuyfirvöld hafa boðað til krísufundar sem gæti jafnvel farið fram strax á morgun. Sambandið sendi frá sér tilkynningu um neyðarfund hjá stjórn sambandsins þar sem kemur fram að þetta mál verði tekið fyrir sem agamál. Spænska stórblaðið Marca segir að Rubiales ætli ekki að segja af sér og ætli að verja sig á neyðarfundi stjórnarinnar.

Notaði peninga sambandsins til að greiða fyrir ferð til New York

Sú vörn gæti hins vegar reynst þrautin þyngri þar sem ásökunum á hendur Rubiales fjölgar enn. Hann hefur nú verið sakaður um að hafa tekið mexíkanska konu með sér í sex daga frí til New York undir því yfirskini að um vinnutengda ferð væri að ræða. Peningar spænska knattspyrnusambandsins voru meðal annars notaðir til að greiða fyrir flug, hótelherbergi og bílaleigubíl á meðan á ferðinni stóð.

Þá á Rubiales að hafa logið til um fundi sem hann ætlaði að sækja. Hann er sagður hafa sagt við sitt nánasta fólk að segja að hann myndi sækja fundi með forráðamönnum MLS-deildarinnar og borða kvöldverð með fólki á vegum Sameinuðu þjóðanna.

Samkvæmt El Confidencial áttu þessir fundir sér aldrei stað. Rannsókn er hafin á málinu en Rubiales gæti átt yfir höfði sér fangelsisdóm verði hann fundinn sekur.

Sakaður um kynferðislega áreitni í viðurvist stórstjarna

Þá hefur fyrrum samstarfskona Rubiales stigið fram og sakað hann um kynferðislega áreitni á vinnustað. Atvikið átti sér stað fyrir framan stórstjörnurnar Gerard Pique, Iker Casillas og Sergio Busquets.

Í sjónvarpsviðtali segir Tamara Ramos Cruz að Rubiales hafi niðurlægt sig ítrekað.

„Fyrir framan fjölda fólks sagði hann að ég væri kominn til að setja á mig hnéhlífar. Ég var bara að vinna mína vinnu. Hann spurði mig einnig hver væri liturinn á undirfötum mínum þann daginn. Hann var svo valdamikill að það var erfitt að mæta honum.“

Umrætt atvik á að hafa átt sér stað fyrir tíu árum síðan. Aðspurð af hverju hún hafi stigið fram nú svarar Cruz:

„Nú trúir fólk mér í ljósi þess að hann kyssti Hermoso án hennar samþykkis. Það kom mér ekki á óvart því ég hef þekkt hann í mörg ár og þjáðst vegna hans. Það sem kom mér á óvart var að hann gerði þetta fyrir allra augum.“