Maguire fer ekki fet og býst við að fá nóg af tæki­færum hjá Man Utd

Sky Sports greinir frá þessu, en West Ham hafði samþykkt að greiða þrjátíu milljónir punda fyrir leikmanninn. Í gær var hins vegar greint frá því að samningaviðræður Maguire og West Ham væru að sigla í strand, en þó væri ekki útilokað að þráðurinn yrði tekinn upp á ný.

Nú greinir Sky Sports hins vegar frá því að samningaviðræður milli leikmannsins við West Ham séu endanlega farnar í vaskinn. Heimildarmenn Sky segja frá því að samkomulag milli Maguire og West Ham hafi í raun aldrei verið í höfn og að ferlið hafi verið styttra á veg komið en talið var í fjölmiðlum.

„Harry Maguire ber virðingu fyrir West Ham og David Moyes, en til að hafa hlutina á hreinu þá var aldrei neitt samkomulag í höfn milli leikmannsins og félagsins,“ segir heimildarmaður Sky Sports.

„Ferlið var mun styttra á veg komið en talið var í fjölmiðlum. Til að mynda hafði Harry aldrei rætt við David Moyes.“

„Harry líður vel hjá United. Hann elskar klúbbinn og hefur trú á því að hann fái nóg af tækifærum til að spila á tímabilinu.“