Innlent

Búrfellslundur settur í bið og óvissa um Hvammsvirkjun

Kristján Már Unnarsson skrifar
Haraldur Þór Jónsson, oddviti og sveitarstjóri Skeiða- og Gnúpverjahrepps, við Þjórsá hjá fyrirhuguðu stíflustæði Hvammsvirkjunar.
Haraldur Þór Jónsson, oddviti og sveitarstjóri Skeiða- og Gnúpverjahrepps, við Þjórsá hjá fyrirhuguðu stíflustæði Hvammsvirkjunar. Sigurjón Ólason

Uppbygging vindorkuvera hérlendis er í uppnámi eftir að Skeiða- og Gnúpverjahreppur setti Búrfellslund, sem Landsvirkjun áformar, í biðstöðu. Sveitarstjórnin hyggst með þessu knýja á um að sveitarfélög og nærsamfélög fái hærri tekjur af orkuverum.

Úrskurðarnefnd umhverfis- og auðlindamála felldi virkjunarleyfi Hvammsvirkjunar úr gildi í síðustu viku, daginn eftir að sveitarstjórn Skeiða- og Gnúpverjahrepps hafði samþykkt framkvæmdaleyfi vegna virkjunarinnar með fjórum atkvæðum gegn einu, þrátt fyrir að sjá lítinn hag fyrir nærsamfélagið.

Í fréttum Stöðvar 2 segir Haraldur Þór Jónsson, oddviti og sveitarstjóri Skeiða- og Gnúpverjahrepps, að Hvammsvirkjun sé stærsta virkjunarframkvæmd sem fyrirhuguð sé í byggð á Íslandi.

„Sveitarfélagið okkar hefur engar tekjur af framkvæmdinni, engin fasteignagjöld og það eru engin störf sem verða til til framtíðar,“ segir Haraldur.

Inntakslón myndast ofan við stíflu Hvammsvirkjunar.Landsvirkjun

Sveitarstjórnin hyggst ekki sætta sig við óbreytt ástand.

„Við tókum þá ákvörðun að fleiri orkumannvirki verða ekki byggð meðan staðan er svona.“

Búrfellslundur, fyrirhugað vindorkuver ofan Búrfells, var færður í nýtingarflokk rammaáætlunar í fyrra, en þar sá Landsvirkjun fram á samrekstur með vatnsaflsstöðvum og að nýta innviði á svæðinu. Þannig eru allar háspennulínur til staðar til að flytja orkuna til notenda.

Landsvirkjun gerir ráð fyrir að Búrfellslundur framleiði um 440 gígavattstundir á ári miðað við þrjátíu vindmyllur. Í Hvammsvirkjun er fyrirhugað að framleiða um 720 gígavattstundir á ári.

Með því að nýta sér lagaheimild sem í reynd setur Búrfellslund í biðflokk sendir sveitarstjórnin þau skilaboð að hún treysti ekki ríkisstjórninni.

Tvær vindmyllur framleiða núna orku norðan Búrfells.Skjáskot/Stöð 2

„Fögur fyrirheit um einhverskonar breytingar sem nú er búið að boða. Ég held að menn verði nú að hugsa aftur til Blönduvirkjunar 1991 og þau fögru fyrirheit sem komu um atvinnuuppbyggingu þar. Menn eru ennþá að bíða.

Við einfaldlega erum að segja: Þetta þjónar ekki hagsmunum okkar þegar okkar tekjustofnar eru undanþegnir.“

-Þetta er sem sagt þvingunaraðgerð?

„Þetta er bara mjög skynsamleg aðgerð gagnvart nærumhverfinu; að byggja upp atvinnu sem sannarlega eflir nærsamfélagð,“ svarar oddvitinn.

Sveitarstjórn Skeiða- og Gnúpverjahrepps samþykkti framkvæmdaleyfi fyrir Hvammsvirkjun í síðustu viku. Daginn eftir var virkjunarleyfi fellt úr gildi.Sigurjón Ólason

Landsvirkjun segir mögulega seinkun á Hvammsvirkjun slæmar fréttir þegar skortur á endurnýjanlegri orku sé fyrirsjáanlegur á næstu árum. Litlar líkur virðast á að hægt verði að bjarga málum með því að reisa vindorkuver í staðinn á svæðinu.

-En hvað þarf að gerast til að þið samþykkið vindmyllugarð við Búrfell?

„Við þurfum bara að sjá skýra lagaumgjörð sem gerir þetta sanngjarnt, gagnvart bæði þeim sem eru með þetta í nærumhverfinu sínu og notandanum,“ svarar Haraldur Þór Jónsson.

Hér má sjá frétt Stöðvar 2:

Skeiða- og Gnúpverjahreppur Vindorka Vatnsaflsvirkjanir Orkumál Orkuskipti Loftslagsmál Lax Stangveiði Landsvirkjun Deilur um Hvammsvirkjun

Tengdar fréttir

Umhverfisráðherra segir Íslendinga ekki geta beðið eftir grænni orku

Umhverfis- og orkumálaráðherra segir útilokað að bíða með öflun grænnar orku á Íslandi ef Íslendingar ætli að ná markmiðum sínum í loftslagsmálum. Nú verði kannað hvað fór úrskeiðis við virkjanaleyfi Hvammsvirkjunar og það megi ekki taka langan tíma. Laga þurfi umsóknarferli vegna virkjana án þess að gefa eftir í umhverfismálum.

Markmið stjórnvalda og virkjana-framkvæmdir fylgjast ekki að

Eini virkjanakosturinn sem Landsvirkjun var komin með á framkvæmdastig er í algerri óvissu eftir að Úrskurðarnefnd umhverfis- og auðlindamála felldi virkjanaleyfi Hvammsvirkjunar úr gildi í gær. Sviðsstjóri hjá Samtökum iðnaðarins segir stjórnvöld hafa brugðist í orkumálum. Allt of margar hindranir væru í kerfinu.

Undirbúningur framkvæmda í uppnám

Forstjóri Landsvirkjunar segir ljóst að undirbúningur framkvæmda við Hvammsvirkjun fari í uppnám eftir að virkjunarleyfi var fellt úr gildi. Til stóð að bjóða út fyrstu undirbúningsáfanga strax í næstu viku.

Talsmaður laxaverndar fagnar og vonar að virkjunin sé úr sögunni

Virkjunaráform í neðri Þjórsá eru í algerri óvissu eftir að úrskurðarnefnd umhverfis og auðlindamála felldi virkjunarleyfi Hvammsvirkjunar úr gildi í dag, aðeins sólarhring eftir að sveitarstjórn Skeiða- og Gnúpverjahrepps samþykkti framkvæmdaleyfi.

Landsvirkjun áformar meiri orkuöflun á fjórum stöðum

Ný orkuöflun Landsvirkjunar stefnir í að verða mjög umfangsmikil á næstu árum, að sögn forstjórans. Auk Hvammsvirkjunar áformar fyrirtækið stækkun virkjana á Þeistareykjum og við Sigöldu sem og vindorkulund við Búrfell.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið