Valsari fór inn í klefa dómara og fékk fimm leikja bann

Í tilkynningu á vef KKÍ segir að Pablo skuli sæta fimm leikja banni vegna háttsemi sinnar í leik Vals og Tindastóls sem fram fór þann 18. maí.

Hannes S. Jónsson, framkvæmdastjóri KKÍ, segir við mbl.is að ástæðan fyrir banninu sé sú að Pablo hafi farið inn í klefa dómara að leik loknum. Má ætla að það hafi verið til að ræða það sem fram fór á lokasekúndum leiksins en umdeilt var hvort dæma hefði átt óíþróttamannslega villu á Tindastól í blálok leiksins.

Tindastóll vann að lokum 82-21 sigur í leiknum með þremur vítaskotum Keyshawn Woods þegar nokkrar sekúndur voru eftir. Enn var þó tími fyrir Valsmenn að geysast fram og þá braut Sigtryggur Arnar Björnsson á Kára Jónssyni en slapp við óíþróttamannslega villu auk þess sem liðsvillur Tindastóls voru ekki orðnar nógu margar til þess að Kári færi á vítalínuna.

Hannes segir Bertone ekki hafa veist að dómurum leiksins en að það hafi verið rangt af honum að fara inn í klefa þeirra. Bæði hann og Valur hafi beðist afsökunar á framferði leikmannsins. Þá hafi öryggisgæslu ekki verið ábótavant þar sem að dómararnir hafi verið búnir að segja gæslumönnum að þeir gætu farið.