Starship gæti flogið í næstu viku

Starship-kerfið samanstendur af gríðarstórri eldflaug og af um fimmtíu metra löngu geimfari sem ber nafnið Starship. Bæði stig kerfisins eru hönnuð til að geta verið notuð mjög hratt aftur, eins og SpaceX hefur gert með Falcon-eldflaugarnar.

Starship á að vera grunnurinn að framtíð SpaceX. Með því að þróa fullkomlega endurnýtanlega eldflaug og geimfar gæti fyrirtækið dregið enn frekar úr kostnaði við geimskot og framkvæmt þau mun oftar en samkeppnisaðilar. Nota á Starship og Super Heavy til að flytja menn og birgðir til tunglsins og jafnvel lengra út í geim.

Sjá einnig: NASA semur við SpaceX um að lenda geimförum aftur á tunglinu

Búið er að stafla Starship geimfarinu ofan á eldflaugina á starfssvæði SpaceX í Texas. Stæðan er um 120 metra há. Super Heavy eldflaugin er búin 33 Raptor hreyflum sem brenna metan og fljótandi súrefni.

Sjá einnig: Færast nær fyrsta geimskoti Starship

Til stendur að skjóta Starship á loft í fyrsta lagi á næsta mánudag, 17. apríl. Fyrst þarf SpaceX þó að fá leyfi yfirvalda í Bandaríkjunum.

Eins og áður segir er Super Heavy stærri og kröftugri en gömlu Saturn V eldflaugarnar sem notaðar voru til að senda geimfara til tunglsins á árum áður. Eldflaugin er einnig stærri en N1 eldflaug Sovétríkjanna, sem fór þó aldrei á loft þrátt fyrir fjórar tilraunir.

Eldflaug SpaceX er einnig stærri og kröftugri en Space Launch System, nýjasta eldflaug Bandaríkjanna, sem flytja á geimfara til tunglsins á komandi árum í Artemis-áætluninni.

Sjá einnig: Artemis-1 loks á leið til tunglsins

Í frétt Ars Technica segir að starfsmenn SpaceX hafi lokið könnunum um síðustu helgi og Starship sé talið tilbúið til geimskots. Stefnan sé sett á geimskot á hádegi á mánudaginn, að íslenskum tíma. Fyrst þarf þó leyfi.

Einnig þarf að gera eina lokaæfingu fyrir geimskotið, sem ekki verður haldin í þessari viku, eins og til stóð. Því gæti verið að ekki takist að skjóta geimfarinu út í geim á mánudaginn. Elon Musk, eigandi SpaceX, sagði á mánudaginn að líklegt væri að af geimskotinu yrði, seinni part næstu viku.

Gangi tilraunaskotið eftir á Starship að fljúga næstum því heilan hring í kringum jörðina á rúmum klukkutíma. Geimfarið á að fara á loft frá Texas og lenda í Kyrrahafinu, norður af Havaí.