Ákvörðun um framtíð Conte hjá Tottenham verði tekin fyrir helgi

Mikið hefur verið rætt og ritað um framtíð Ítalans hjá félaginu eftir brösulegt gengi liðsins á tímabilinu. Stuðningsmenn Tottenham eru að horfa á enn eitt tímabilið án titils þar sem liðið er fallið úr leik í Meistaradeild Evrópu og báðum bikarkeppnunum á Englandi.

Þá var Conte líklega ekki að vinna sér inn mörg stig hjá stjórnendum félagsins þegar hann lét allt og alla heyra það í langri ræðu á blaðamannafundi eftir 3-3 jafntefli liðsins gegn Southampton um liðna helgi.

Margir hafa því velt því fyrir sér hvort Conte sé einfaldlega að biðja um að láta reka sig, en heimildarmenn Sky Sports segja hins vegar að svo sé ekki. Samkvæmt þeim hafi þjálfarinn einungis verið að tjá skoðanir sínar á því sem gengur á innan félagsins, skoðanir sem hann hafi lengi setið á. Conte hafi ekki ætlað sér að ráðast á leikmenn eða stjórnarmeðlimi Tottenham.

Samningur Conte við Tottenham rennur út í lok tímabils, þó félagið hafi enn möguleika á að framlengja við Ítalann um eitt ár. Það verður þó að teljast ansi ólíklegt að einhverskonar framlenging sé í kortunum og margir telja að leiðir hans við félagið muni skilja mun fyrr.