United valtaði yfir Real Betis og svaraði fyrir risatapið

Manchester United vann í kvöld 4-1 sigur á Real Betis í 16-liða úrslitum Evrópudeildarinnar. United er því í góðri stöðu fyrir síðari leik liðanna á Spáni í næstu viku.

Erik Ten Hag kom mörgum á óvart í kvöld með því að stilla upp sama byrjunarliði og gegn Liverpool um síðustu helgi en United tapaði þar 7-0 eins og frægt er orðið.

Þeir ætluðu augljóslega að svara fyrir það tap í kvöld. Marcus Rashford kom United yfir strax á 6.mínútu þegar hann skoraði eftir skyndisókn. Real jafnaði þó fyrir hlé með góðu marki Ayoze Perez.

Í síðari hálfleik lék United hins vegar frábærlega. Antony kom United í 2-1 á  52.mínútu með frábæru skoti í fjærhornið og Bruno Fernandes bætti þriðja markinu við eftir hornspyrnu.

Á 83.mínútu fór svo Wout Weghorst langt með að klára einvígið þegar hann fylgdi eftir skoti sem hafði verið varið.

Lokatölur 4-1 og stuðningsmenn United eflaust sáttir með frammistöðu liðsins í síðari hálfleiknum. Liðin mætast á nýjan leik á Spáni eftir viku.