Lífið

Marsspá Siggu Kling - Hrútur

Sigga Kling skrifar

Elsku Hrúturinn minn, það eru svo miklar breytingar í kringum litlu hlutina. Þú getur pirrað þig svo mikið yfir einhverju sem er fyrir framan þig en svo er það bara alls ekki neitt. Það er eins og þú komist út úr öllum þrengingum og stoppum. Og alveg sama hversu svartur þér finnst dagurinn vera, þá er eins og það heyrist acrabadabra, búmm og málið er leyst.

  • Hrúturinn er frá 21. mars til 19. apríl.

Ekki stífna allur upp þó stressaður sért. Láttu ekki fólk fara í taugarnar á þér, því það er þinn versti galli að þú getur verið með stuttan þráð. Svo þú ættir að hafa það sem þitt mottó, að það er betra að þegja en að vera of fljótfær að segja. Þetta er sterk viðvörun og þú skalt hafa hana í huga út marsmánuð. Það er líka svo margt að snúast núna sem tengist þér. Þú þarft að taka þátt í sem flestu og vera með marga bolta á lofti. Því ef einhver vinnur vel, þá ert það þú elsku hjarta og sérstaklega ef þú ert á tánum.

Í kringum 23. til 25. mars klappar þú lófunum saman. Það eru svo góðar fréttir og falleg útkoma að þú getur andað léttar. Í upphafi marsmánaðar er mikil streitukveisa hjá ótrúlegasta fólki. Þú ræður hvort þú sogir þá orku inn í hjartastöðina og látir þér líða illa út af öðrum eða setjir bara höndina á hjarta þitt og segir: Hamingjan býr í mínu hjarta og ég verð sterkari og sterkari. Eitt af því sem kemur líka hér fram er að vegna afstöðu himintunglanna átt þú að taka þínar ákvarðanir sjálfur og sér. Og þó að þú leggir dæmið fyrir fjölskyldu og vini, þá er það alltaf hjá þér sjálfum að taka úrslitaákvörðun.

Þegar líða tekur á og lengra er komið, þá birtir til yfir heimili, gæti verið annar staður sem þú verður á, en allt gerist mjög hratt. Þetta gæti samt dregist fram í maímánuð, en sú orka byrjar í kringum 24. mars. Vertu glaður yfir því smáa og smáatriðunum því að þá verða þér sendir stærri hlutir og stærri verkefni. Það verður blússandi nóg að gera fyrir duglega Hrúta og þú finnur alltaf peninga ef þú leitar bara aðeins meira og á öðrum stöðum.

Knús og kossar, Sigga Kling






Fleiri fréttir

Sjá meira


×