Innlent

Réðst á leigubílsstjóra og rændi bílnum

Samúel Karl Ólason skrifar
Aðstoða þurfti minnst tvo aðra leigubílstjóra í nótt vegna farþega sem neituðu að greiða fyrir far eða voru til vandræða.
Aðstoða þurfti minnst tvo aðra leigubílstjóra í nótt vegna farþega sem neituðu að greiða fyrir far eða voru til vandræða. Vísir/Vilhelm

Lögregluþjónar handtóku í nótt mann sem grunaður er um að hafa ráðist á leigubílstjóra og rænt bíl hans. Leigubílstjórinn óskaði eftir aðstoð í nótt og sagði að farþegi hefði ráðist á sig og náð að reka sig úr bílnum. Farþeginn hafi í kjölfarið ekið á brott á leigubílnum.

Í dagbók lögreglu segir að bíllinn hafi verið stöðvaður skömmu síðar og bílræninginn hafi verið handtekinn, grunaður um rán, akstur undir áhrifum áfengis og önnur brot. Hann var vistaður í fangaklefa.

Leigubílstjórinn fór á bráðamóttöku en lögreglan hefur ekki upplýsingar um meiðsl hans.

Aðstoða þurfti minnst tvo aðra leigubílstjóra í nótt vegna farþega sem neituðu að greiða fyrir far eða voru til vandræða.

Þá höfðu lögregluþjónar afskipti af erlendum einstakling í Hlíðunum sem grunaður var um vörslu fíkniefna. Þá kom í ljóst að hann var hér á landi ólöglega og var hann handtekinn og vistaður í fangaklefa.

Tvö slagsmál voru tilkynnt í Hafnarfirði í nótt. Tveir voru handteknir í öðru tilvikinu og eru grunaðir um líkamsárás.

Í dagbókinni segir einnig að minnst tvö umferðaróhöpp hafi átt sér stað á höfuðborgarsvæðinu. Í einu tilfelli valt bíll á Reykjanesbraut í Kópavogi. Þar urðu meiðsl minniháttar en bíllinn var töluvert skemmdur. Draga þurfti tvo bíl af vettvangi eftir bílslys á Miklubraut en þar var ekki vitað um meiðsli.

Lögreglunni barst einnig tilkynning um skrifborðsstól sem einhver hafði komið fyrir á Miklubraut. Stóllinn var þó horfinn þegar lögregluþjóna bar að garði.

Lögreglumál Leigubílar
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið