Fótbolti

Lazio úr leik í Evrópudeildinni en Monaco tryggði sig áfram

Smári Jökull Jónsson skrifar
Sergej Milinkovic-Savic og Sebastian Szymanski berjast um boltann í leik Lazio og Feyenoord í kvöld.
Sergej Milinkovic-Savic og Sebastian Szymanski berjast um boltann í leik Lazio og Feyenoord í kvöld. Vísir/Getty

Lazio er úr leik í Evrópudeildinni í knattspyrnu en lokaumferð riðlakeppninnar var að ljúka í fjórum riðlum. Monaco tryggði sér hins vegar áfram með sigri á Rauðu Stjörnunni á heimavelli.

Fyrir leikinn í kvöld var Lazio í efsta sæti síns riðils með átta stig en Feyenoord og danska liðið Midtjylland voru með fimm stig í öðru og þriðja sæti.

Feyenoord og Lazio mættust í Rotterdam þar sem mikið var í húfi. Þar skoraði Santiago Gimenez eina mark leiksins á 64.mínútu og tryggði Feyenoord sigur.

Á sama tíma vann Midtjylland 2-0 sigur á Sturm Graz á heimavelli þar sem Anders Dreyer var hetja liðsins og skoraði bæði mörkin. Feyenoord endar því í efsta sæti F-riðils og fer beint í 16-liða úrslit Evrópudeildarinnar en Midtjylland nær öðru sætinu og fer í umspil gegn liði sem hafnaði í þriðja sæti Meistaradeildarinnar.

Í G-riðli var Freiburg búið að tryggja sér efsta sæti riðilsins en þeir gerðu 1-1 jafntefli við Qarabag á útivelli í kvöld. Nantes stal hins vegar öðru sætinu af Qarabag með því að vinna Olympiacos á útivelli 2-0.

Í H-riðli fara Ferencvaros og Monaco áfram í keppninni. Ferencvaros tryggði sér efsta sætið þrátt fyrir 1-0 tap gegn Trabzonspor en Monaco náði öðru sæti eftir 4-1 sigur á Rauðu Stjörnunni.


Tengdar fréttir

United vann á Spáni en náði ekki efsta sætinu

Manchester United vann 1-0 útisigur á Real Sociedad þegar liðin mættust í lokaumferð riðlakeppni Evrópudeildarinnar nú í kvöld. Sigurinn dugir United þó ekki til að ná efsta sæti riðilsins og þarf liðið því að leika umspilsleik við lið úr Meistaradeildinni til að tryggja sér sæti í 16-liða úrslitum.




Fleiri fréttir

Sjá meira


×