Lagið hefur slegið rækilega í gegn og hefur nú verið í heilan mánuð á toppi lista yfir íslensk lög sem mest eru spiluð á Spotify. Það mun vera met og stefnir í að fá íslensk dægurlög lög hafi notið viðlíkra vinsælda. Lagið hefur hins vegar lítið heyrst á tónlistarríkisrásinni Rás 2 og ekki sést þar á neinum listum.

Hvort Atli Már hafi staðið í vegi fyrir spilun lagsins

Eftir því sem Vísir kemst næst vildu þeir Einar Þór og Sölvi fá svör við því hvernig þetta megi vera? Og hvort ástæðuna megi ef til vill rekja til þess að Atli Már Steinarsson dagskrárgerðarmaður Ríkisútvarpsins hafi hlutast til um að lagið sé ekki spilað? 

Atli Már hefur haft sig í frammi á Twitter og sakað Bubba Morthens um gerendameðvirkni en kærasta hans er ein þeirra sem stigið hafa fram og sakað Auð um kynferðisofbeldi í samtali við Eddu Falak, hlaðvarpsstjóra og blaðamann Stundarinnar.

Ábendingar hafa borist Vísi þess efnis að Atli Már hafi ekki verið við stjórnvölinn eins og venjulega með tónlistarþátt sinn Atli það ekki síðastliðinn laugardag, heldur hljóp Birgir Örn Steinarsson þá í skarðið.

Matthías Már Magnússon er dagskrárstjóri Rásar 2 og hann hafnar því alfarið í samtali við Vísi að Atli Már hafi verið settur á ís eftir téðan fund. Hann sé í fjölskyldufríi á Bretlandseyjum og það hafi verið löngu ákveðið. „Hann vissi ekkert um þennan lögfræðihitting,“ segir Matthías Már.

Lagið fór á C-lista

Þá hafnar Matthías Már því að lagið Tárin falla hægt hafi verið útilokað, það hafi farið á spilunarlista og verið kynnt í þættinum Popplandi eins og önnur ný íslensk lög. Spurður segir hann það rétt að lagið hafi farið á svokallaðan C-lista sem þýðir að lagið heyrist ekki oft og á tímum þegar hlustun á stöðina er í lágmarki.

„Það er rétt hjá þér, það er ósamræmi milli spilunar lagsins á Spotify og svo á Rás 2,“ segir Matthías. En fyrir því séu ástæður svo sem þær að á Rás 2 sé lagt upp úr að spila fleiri lög en færri.

„Það má vel vera að Bubba finnist skrítið að við höfum ekki spilað þetta eins mikið og aðrar útvarpsstöðvar. En við spilum fleiri titla sjaldnar, það er gefið út ógrynni af tónlist og það hefur verið taktík Rásar 2 að spila frekar mörg lög en fá. Við viljum setja fleiri lög á dagskrá og kynna meira,“ segir Matthías Már. 

Hann segir jafnframt að þar á bæ sé ekki tekið mið af Spotify; þeir gerðu þá varla mikið annað en að spila lög sem ná máli þar. Ógrynni af íslenskri tónlist sé gefin út og lagt sé upp með að kynna hana. „Það eru milljón lög sem gera gott mót á Spotify sem við spilum lítið sem ekkert.“

Þá bendir dagskrárstjórinn á að Rás 2 sé einnig talmálsstöð og dagskrárgerðarfólk ráði mikið til því hvaða tónlist er spiluð. Matthías Már segir, hvað varði hlut Atla Más, þá sé það svo að hann sé ekki og hafi aldrei verið í tónlistarráði Rásar 2.

„Það er vissulega rétt að hann kom að máli við mig áður en lagið kom út og hafði sínar skoðanir á því. En hann sagði líka, í viðurvist vitnis, að hann væri líklega vanhæfur til að tjá sig um það.“

Vísir setti sig í samband við Bubba Morthens vegna þessa en hann vildi ekki tjá sig um málið að svo stöddu máli.