Argentínska þjóðin á tauginni eftir að hver stjarnan á fætur annarri meiðist

Vonir og væntingar argentínsku þjóðarinnar eru miklar en Argentína hefur ekki orðið heimsmeistari síðan að Diego Maradona leiddi liðið til sigurs á HM í Mexíkó.

Mörgum þeirra finnst jafnvel Messi (og argentínska þjóðin) eiga heimsmeistaratitilinn skilinn til að kóróna magnaðan feril sinn.

Það lítur þó ekki út fyrir að örlögin séu alveg sammála því. Þrír öflugir sóknarleikmenn liðsins, Messi einn af þeim, hafa meiðst að undanförnu.

Lionel Messi hefur misst af tveimur síðustu leikjum Paris Saint Germain vegna meiðsla og í þessari viku hafa bæði Paulo Dybala og Ángel Di María meiðst.

Dybala tognaði þegar hann skoraði úr vítaspyrnu fyrir Roma um helgina og Di María fór niðurbrotinn af velli eftir að hafa meiðst í leik Juventus og Maccabi Haifa í Meistaradeildinni.

Messi verður væntanlega búinn að ná sér í tíma fyrir HM en það er mikil óvissa með hina tvo.

Argentínumenn eiga auðvitað fleiri sóknarmenn eins og Lautaro Martínez hjá Internazionale og Julián Álvarez hjá Manchester City en missirinn væri kannski meiri af Di María en Dybala.

Di María hefur skorað 25 mörk fyrir argentínska landsliðið og eitt þeirra tryggði argentínska landsliðinu sigur á Brasilíu í úrslitaleik Suðurameríkukeppninnar 2021 sem var fyrsti titilinn sem Messi vann með A-landsliðinu.