Fótbolti

Finnst bjór vondur en hefur framleiðslu á „Bale Ale“

Valur Páll Eiríksson skrifar
Gareth Bale með einn Bale Ale. Hann drekkur hann þó líkast til ekki sjálfur.
Gareth Bale með einn Bale Ale. Hann drekkur hann þó líkast til ekki sjálfur. Instagram/@glamorganbrewing

Fótboltamaðurinn Gareth Bale hefur sjósett bjórvörumerki í samstarfi við velska bruggverksmiðju. Sölu á bjórnum er ætlað að styrkja grasrótarstarfsemi í velskum fótbolta.

Bale samdi í sumar við Los Angeles FC í bandarísku MLS-deildinni eftir átta ár hjá spænska stórveldinu Real Madrid. Hann verður hluti af velska landsliðinu sem fer á HM í Katar í vetur en Wales er þar í fyrsta skipti frá 1958.

Í ljósi þess sögulega afreks hjá Wales að komast á HM á ný hefur Bale hafið samstarf við velsku bruggverksmiðjuna Glamorgan Brewing Co um nýtt vörumerki sem nefnt er eftir Bale, en hann er markahæsti landsliðsmaður í sögu Wales með 40 landsliðsmörk.

Öl og lager verða framleidd með nafni Bale, það er Bale Ale og Bale Lager. Bale hefur hafið þetta samstarf þrátt fyrir að drekka sjálfur ekki en hann sagði í viðtali árið 2010 að honum „líkaði ekki bragðið af bjór“. Þetta er þó allt gert fyrir gott málefni þar sem hagnaður af bjórnum rennur til yngri flokka starfs í velskum fótbolta.

„Með þessu samstarfi stefnum við á að gefa til baka til velsku grasrótarinnar, og sérstaklega viljum við hjálpa til við þróun fótboltaaðstöðu. Við vonum að stuðningsmenn velska landsliðsins geti notið Bale Ale og Lagers er við undirbúum okkur fyrir HM í ár,“ er haft eftir Bale.

Óvíst er þó hversu mikið velsku stuðningsmennirnir geti notið ölsins er HM fer fram í Katar í vetur vegna harðra laga í landinu um áfengisnotkun.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.