Sport

Nýliðinn átti tilþrif kvöldsins

Sindri Sverrisson skrifar
Árni Ágúst Daníelsson mundar fyrstu píluna af þremur, í þann mund að fara að jafna leikinn við Matthías Örn Friðriksson í 1-1.
Árni Ágúst Daníelsson mundar fyrstu píluna af þremur, í þann mund að fara að jafna leikinn við Matthías Örn Friðriksson í 1-1. Stöð 2 Sport

Árni Ágúst Daníelsson, sem hóf að æfa pílukast í byrjun þessa árs, sýndi frábær tilþrif á öðru keppniskvöldi Úrvalsdeildarinnar í pílukasti.

Árni virtist ekki kippa sér mikið upp við það að vera að keppa við þrjá andstæðinga sem unnið hafa Íslandsmeistaratitla, í beinni útsendingu á Stöð 2 Sport, og átti meðal annars tilþrif kvöldsins þó að hann hafi að lokum þurft að sætta sig við tap í leikjunum þremur.

Bestu tilþrifin sýndi Árni þegar hann jafnaði metin í 1-1 gegn Matthíasi Erni Friðrikssyni, Íslandsmeistara síðustu þriggja ára. 

Árni átti eftir 132 til að komast niður í núllið og byrjaði á að kasta í ytri miðjuhring píluspjaldsins, til að fara niður um 25 stig. Hann hitti svo í þrefaldan nítján, og þar með stóðu eftir 50 punktar sem hann gat náð með því að hitta akkúrat í miðja skífuna. Það gerði Árni eins og sjá má hér að neðan.

Klippa: Árni Ágúst með hæsta útskot kvöldsins

Þetta reyndist hæsta útskot kvöldsins en Árni varð að lokum að sætta sig við 3-2 tap gegn Matthíasi, eftir að hafa tapað þremur leggjum naumlega. Hann tapaði einnig gegn Vitor Charrua og Hallgrími Egilssyni, báðum leikjum 3-1, en það var Vitor sem stóð uppi sem sigurvegari kvöldsins, sem tryggði honum sæti á úrslitakvöldinu í desember.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.