Innlent

„Leit á það sem plús í sinum kladda að velja leg­lausa konu til að starfa með“

Kristín Ólafsdóttir skrifar
Sunna Dóra Möller og Karen Lind Ólafsdóttir, prestar í Hjallakirkju.
Sunna Dóra Möller og Karen Lind Ólafsdóttir, prestar í Hjallakirkju. Vísir/Dúi

Prestar í Hjallakirkju lýsa stöðugri niðurlægingu og kynbundinni áreitni af hálfu starfsbróður síns, sem áminntur verður fyrir hegðun sína. Andrúmsloftið á vinnustaðnum hafi verið óbærilegt. Framtíð prestsins innan þjóðirkjunnar er óráðin.

Það tók óháð teymi þjóðkirkjunnar tæpt ár að fara yfir ásakanir sex kvenna innan Digranes- og Hjallaprestakalls á hendur séra Gunnari Sigurjónssyni. Alls 48 atvik sem konurnar sögðu frá voru skoðuð - og teymið telur staðfest að í tíu tilvikum hafi Gunnar orðið uppvís að ósæmilegri háttsemi. Tvær kvennanna segja tilvikin niðurlægjandi og sár.

„Ég mæti á minn vinnustað til þess að sinna mínu starfi en fæ virkilega óviðeigandi athugasemdir um klæðaburðinn minn, vöxtinn minn, líkama minn,“ segir Karen Lind Ólafsdóttir, prestur í Hjallakirkju.

Karen, sem fór í legnám vegna krabbameins, nefnir dæmi - sem teymið hafi flokkað sem svokallaða „orðbundna kynbundna áreitni“.

„Að það væri svo gott að ég væri getulaus og væri ekki að láta barna mig því það væri svo óhentugt að vera með konur í vinnu sem væru að taka sér fæðingarorlof. Og leit á það sem plús í sinum kladda að velja leglausa konu til að starfa með,“ segir Karen.

„Ég er leið að þessi framkoma hafi átt sér stað og eg er leið að hafa þurft að berjast svona rosalega fyrir því að fá að segja satt.“

En Karen og Sunna Dóra Möller, einnig prestur í Hjallakirkju, hrósa biskupi fyrir skýra afstöðu með þolendum. „Þjóðkirkjan harmar þann sársauka sem þolendur hafa upplifað. Þjóðkirkjan hafnar allri ofbeldismenningu og stendur ávallt með þolendum,“ segir í tilkynningu kirkjunnar um málið í gær.

„Ef við sjálf sem stofnun og við sem prestar, ef við getum ekki tekið fast á okkar málum hvað varðar ofbeldi, þá erum við ekki trúverðug út á við,“ segir Sunna.

Framtíðin til skoðunar

Fleiri mál af sambærilegum meiði hafa komið upp innan kirkjunnar síðustu ár. Síðla árs 2018 var séra Ólafi Jóhannssyni presti í Grensáskirkju veitt lausn frá störfum eftir ásakanir um kynferðisbrot. Embætti hans var lagt niður 2019 með sameiningu prestakalla.

Séra Gunnar hefur látið af störfum sem sóknarprestur í Digraneskirkju og þá stendur til að veita honum áminningu. Framtíð hans innan þjóðkirkjunnar er þó enn til skoðunar en ekki stendur til að rifta ráðningarsambandi við hann, að sögn Péturs Markan biskupsritara. Þá hefur ekki verið tekin ákvörðun um hvort Gunnar verði settur prestur annars staðar. 

Þá getur biskupsstofa ekki veitt upplýsingar um mál annars prests á höfuðborgarsvæðinu sem sendur var í leyfi um svipað leyti og Gunnar aðrar en þær að viðkomandi prestur er ekki starfandi. Ekki náðist í séra Gunnar við vinnslu fréttarinnar og þá gaf Agnes Sigurðardóttir biskup Íslands ekki kost á viðtali vegna málsins í dag.


Tengdar fréttir

Uppvís að kynferðislegri áreitni í tvígang

Teymi Þjóðkirkjunnar hefur metið sem svo að tíu sinnum hafi sóknarprestur kirkjunnar orðið uppvís að háttsemi sem stríði gegn ákvæðum EKKO-reglugerðar kirkjunnar (reglugerð um einelti, kynbundna og kynferðislega áreitni, sem og annað ofbeldi). Presturinn hefur látið af störfum og áformað er að veita honum áminningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.