Fótbolti

Leik Arsenal í Evrópudeildinni frestað

Valur Páll Eiríksson skrifar
Arsenal spilar ekki á fimmtudaginn.
Arsenal spilar ekki á fimmtudaginn. Getty Images

Leik Arsenal við PSV Eindhoven í Evrópudeildinni í fótbolta hefur verið frestað sökum andláts Elísabetar II Bretadrottningar. Óvissa er um leiki komandi helgar í ensku deildarkeppnunum.

Arsenal tilkynnti um frestunina á heimasíðu sinni í dag. Ákvörðunin um að fresta leiknum var tekin í samráði við lögregluyfirvöld í Lundúnum, en leikurinn átti að fara fram á Emirates-leikvanginum, heimavelli Arsenal þar í borg.

Mikið álag er á lögreglunni vegna komandi jarðarfarar Elísabetar sem fer fram mánudaginn næsta, 19. september.

Í yfirlýsingu frá Knattspyrnusambandi Evrópu, UEFA, segir að frestunin hafi verið „vegna verulegrar skerðingar á mönnun lögreglu og skipulagsvandræða tengda atburðum í kringum þjóðarsorg vegna hennar hátignar Elísabetar II drottningar,“.

Ekki er ljóst hvenær leikurinn fer fram en þá eru leikir í ensku úrvalsdeildinni næstu helgi einnig sagðir í uppnámi vegna skorts á lögreglumönnum til að manna þá leiki. Fjölmiðillinn Sky glímir sömuleiðis við mönnunarvanda vegna anna sökum andlátsins, en Sky Sports á samkvæmt plani að sýna átta leiki í ensku úrvalsdeildinni um helgina.




Fleiri fréttir

Sjá meira


×