Íslenski boltinn

Sjáðu mörkin úr hasarnum í Víkinni

Runólfur Trausti Þórhallsson skrifar
Það var nóg um að vera í leik KR og Víkings í gær.
Það var nóg um að vera í leik KR og Víkings í gær. Vísir/Diego

Íslands- og bikarmeistarar Víkings eiga enn möguleika á að verja báða titla sína eftir magnaðan 5-3 sigur á KR í stórbrotnum leik í Víkinni í gærkvöld. Hér að neðan má sjá mörkin úr leik gærkvöldsins.

Hallur Hansson hélt hann hefði komið KR yfir á 16. mínútu eftir stórbrotna fyrirgjöf Atla Sigurjónssonar, raunar var um tvær frábærar fyrirgjafir að ræða. Á endanum ákvað Pétur Guðmundsson, dómari leiksins, að dæma markið af vegna rangstöðu í fyrri fyrirgjöf Atla.

Ægir Jarl Jónasson var þá talinn vera fyrir innan þegar hann reyndi að ná til knattarins, sem hann þó ekki gerði. Rangstaða var hins vegar á endanum niðurstaðan og markið dæmt af.

Víkingar þurftu að gera skiptingu um miðbik fyrri hálfleiksins. Bakvörðurinn Karl Friðleifur Gunnarsson kom af velli og sóknarmaðurinn Helgi Guðjónsson kom inn. Sóknarsinnuð skipting Arnars Gunnlaugssonar bar árangur skömmu síðar er Pablo Punyed, sem var mættur í vinstri bakvörðinn, gaf fyrir og Erlingur Agnarsson stangaði knöttinn í netið.

Erlingur var ískyggilega einn í markteig KR og varnarleikurinn ekki upp á marga fiska. Að því var ekki spurt og staðan orðin 1-0.

Aðeins fimm mínútum síðar var staðan orðin 2-0. Markið var keimlíkt fyrsta markinu en að þessu sinni átti Helgi Guðjónsson sendingu inn á teig og Birnir Snær Ingason kom boltanum í netið. Aftur var leikmaður Víkinga ískyggilega einn á auðum sjó í vítateig KR.

Undir blálok fyrri hálfleik minnkaði Theodór Elmar Bjarnason muninn með yfirvegaðri afgreiðslu eftir að boltinn barst til hans eftir fyrirgjöf Kennie Chopart. Staðan 2-1 er gengið var til búningsherbergja í hálfleik.

Þegar tíu mínútur voru liðnar af síðari hálfleik kom Ari Sigurpálsson heimamönnum 3-1 yfir. Hann var sendur í gegn upp vinstri vænginn eftir að Kennie og Atli gátu ekki stöðvað sókn Víkinga. Ari fékk að vaða einn og óáreittur inn á teig, Arnór Sveinn Aðalsteinsson mætti á endanum af hálfum hug en Ari kláraði auðveldlega niðri í hornið fjær.

Stefán Árni Geirsson kom inn af bekk KR og breytti sóknarleik liðsins. Hann gaf fyrir markið á 66. mínútu og þar var Atli Sigurjónsson af öllum mönnum mættur og skallaði af öryggi í netið, staðan orðin 3-2 og leikurinn galopinn.

Á 83. mínútu átti sér stað ótrúlegt atvik. Boltinn kom inn á teig Víkinga, það var brotið á leikmanni KR en Stefán Árni skilaði boltanum hins vegar í netið nánast á sömu sekúndu. Pétur dómari hafði hins vegar blásið í flautu sína og dæmt vítaspyrnu.

Hún stóð og Pétri til mikillar lukku þá skoraði Sigurður Bjartur Hallsson úr vítinu og staðan orðin jöfn 3-3.



Adam var þó ekki lengi í paradís því aðeins tveimur mínútum síðar fengu Víkingar vítaspyrnu. Að þessu sinni var Pétur heila eilífð að flauta en benti á endanum á punktinn. Pontus Lindgren hafði togað Danijel Dejan Djuric niður innan vítateigs að mati Péturs og aðstoðardómara hans.

Helgi fór á punktinn og skoraði af öryggi, staðan orðin 4-3 bikarmeisturum Víkings í vil.

Það var svo varamaðurinn Sigurður Steinar Björnsson sem gulltryggði sigur Víkinga á 89. mínútu með fínu marki. Lokatölur 5-3 og Víkingar komnir í undanúrslit Mjólkurbikars karla 2022.


Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.