Fótbolti

Fylkir stefnir hraðbyri að sæti í efstu deild

Hjörvar Ólafsson skrifar
Emil Ásmundsson var í byrjunarliði Fylkis í sigrinum í dag. 
Emil Ásmundsson var í byrjunarliði Fylkis í sigrinum í dag.  Vísir/Bára

Fylkir er á góðri leið með að endurheimta sæti sitt í efstu deild karla í fótbolta. Fylkismenn höfðu betur gegn Vestra með einu marki gegn engu í 16. umferð Lengjudeildarinnar í dag. 

Það var danski sóknarmaðurinn Mathias Laursen sem tryggði Fylki stigin þrjú með marki sínu á 55. mínútu leiksins. 

Eftir þennan sigur hefur Fylkir, sem féll úr efstu deild síðasta haust, 36 stig í öðru sæti deildarinnar. Árbæingar eru einu stigi á eftir HK sem trónir á toppnum og níu stigum á undan Fjölni sem er í þriðja sæti. 

Vestri siglir hins vegar lygnan sjó með 22 stig í sjöunda sæti deildarinnar en liðið er 11 stigum frá fallsvæði deildarinnar. 

Fylkir var þarna að bera sigurorði í sínum sjöunda leik í röð en liðið er enn fremur taplaust í síðustu átta leikjum leikjum sínum eða allt frá því að liðið féll úr leik fyrir Ægi í 16 liða úrslitum Mjólkurbikarsins í lok júní.  




Fleiri fréttir

Sjá meira


×