Fótbolti

Fylkir nældi í stig gegn toppliðinu

Hjörvar Ólafsson skrifar
FH er í góðri stöðu í baráttu sinni um að komast upp um deild. 
FH er í góðri stöðu í baráttu sinni um að komast upp um deild.  Mynd/FH

Fylkir og FH skildu jöfn, 1-1, þegar liðin áttust við í 13. umferð Lengjudeildar kvenna í fótbolta á Würth-vellinum í Árbænum í kvöld. 

Elísa Lana Sigurjónsdóttir kom FH yfir strax á þriðju mínútu leiksins en Aldís Guðlaugsdóttir varð fyrir því óláni að skora sjálfsmark í upphafi seinni hálfleiks og þar við sat. 

FH missti þarna af tveimur stigum í vegferð sinni að tryggja sér sæti í efstu deild á næsta keppnistímabili. FH-ingar tróna á toppi deildarinnar með 33 stig eftir þessi úrslit en HK er í öðru sæti með 29 stig Tindastóll því þriðja með 28 stig. 

Víkingur komst svo upp í fjórða sæti deildarinnar með 26 stig með því að leggja Augnablik að velli með þremur mörkum gegn tveimur á Kópavogsvelli. 

Bergdís Sveinsdóttir skoraði tvö marka Víkings og Christabel Oduro eitt en gestirnir komust í 3-0 í leiknum. Katla Guðmundsdóttir og Harpa Helgadóttir löguðu hins vegar stöðuna fyrir Augnalik. 

Fylkir og Augnablik sigla lygnan sjó en liðin eru með 12 stig í sjötta til sjöunda sæti og eru átta stigum frá fallsvæðinu.  

Upplýsingar um úrslit, markaskorara og stöðu í deildinni eru fengnar frá fotbolta.net. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.