Kristall Máni semur við Rosen­­borg: Nær tveimur leikjum í við­bót með Víkingum

Hinn tvítugi Kristall Máni skrifar undir fjögurra ára samning við Rosenborg eða út tímabilið 2026. Þá segir á vefsíðu norska félagsins að Kristall Máni muni skipta þann 1. ágúst er félagaskiptaglugginn í Noregi opnar. Hann nær því tveimur leikjum til viðbótar með Víkingum.

Undanfarna daga hefur mikið verið rætt og ritað um framtíð hins tvítuga Kristals Mána sem var frábær með Íslands- og bikarmeisturum Víkings á síðustu leiktíð. Hann hefur haldið áfram að spila vel í sumar, bæði með Víkingum sem og U-21 árs landsliði Íslands. Átti hann stóran þátt í að U-21 árs landsliðið komst í umspil um sæti á lokakeppni EM.

Hann var svo frábær meðan hans naut við í fyrri leik Víkings og Malmö í undankeppni Meistaradeildar Evrópu en hann fékk sitt annað gula spjald eftir að hafa jafnað metin í 1-1 þar sem dómari leiksins taldi hann vera að ögra stuðningsfólki Malmö.

Hann flaug til Noregs um helgina og hefur gengið frá sínum málum þar sem Rosenborg tilkynnti hann sem nýjan leikmann nú í morgunsárið. Færsla liðsins á Twitter vekur athygli en þar má sjá lyndistákn (e. emoji) sem er með fingur uppi að vörum sínum, sama handahreyfing og Kristall Máni fékk sitt annað gula spjald fyrir gegn Malmö.

„Það er mjög gott að vera hér. Borgin er fín, leikvangurinn er flottur. Þetta er risastórt félag og ég er spenntur. Það voru nokkur önnur lið sem höfðu áhuga en eftir að ég heyrði af áhuga Rosenborgar var valið einfalt,“ sagði Kristall Máni í kynningarmyndbandi félagsins.

„Ég tel mig nokkuð skapandi leikmann, vill vera með boltann og skapa annað hvort færi eða mörk. Þegar ég kom aftur til Íslands var ég hægri bakvörður en ég hef breyst mikið og er orðinn mun meira sóknarþenkjandi. Draumurinn minn er að vinna deildina, ég vil einblína á það og svo sjáum við hvað gerist.“

Rosenborg er sem stendur í 5. sæti norsku úrvalsdeildarinnar með 21 stig eftir 13 leiki. Á liðið tvo leiki til góða á Viking sem er með 25 stig í 3. sætinu. 

Rosenborg er eitt af stærstu liðum Norðurlanda. Hefur liðið orðið Noregsmeistari 26 sinnum, oftast allra liða landsins. Þá hefur liðið 12 sinnum orðið bikarmeistari.