Fótbolti

Clattenburg fær það verkefni að laga dómaramálin í Egyptalandi

Hjörtur Leó Guðjónsson skrifar
Mark Clattenburg á að taka til í dómaramálum egypsku deildarinnar.
Mark Clattenburg á að taka til í dómaramálum egypsku deildarinnar. Vísir/Getty

Mark Clattenburg, fyrrverandi dómari í ensku úrvalsdeildinni, hefur verið ráðinn sem yfirmaður dómaramála í Egyptalandi.

Egypska knattspyrnusambandið, EFA, tók þessa ákvörðun í gær, en mörg af félögunum í Egyptalandi hafa kvartað yfir lélegri dómgæslu á nýafstaðinni leiktíð.

Kvartanirnar hafa gengið svo langt að undanfarin ár hafa einhver lið hótað að draga sig úr deildinni í mótmælaskyni. Félögin telja að slæmar ákvarðanir dómara í deildinni hafi kostað liðin stig.

Clattenburg er reynslumikill dómari, en á árunum 2000-2017 dæmdi hann tæplega 600 deildar-, Evrópu- og landsleiki. Árið 2016 dæmdi hann bæði úrslitaleik Meistaradeildarinnar og úrslitaleik Evrópumeistaramótsins.

Þessi 47 ára fyrrum dómari yfirgaf ensku úrvalsdeildina árið 2017 þegar hann tók við sem yfirmaður dómaramála í Sádí-Arabíu þar sem hann tók við af fyrrverandi kollega sínum úr ensku úrvalsdeildinni, Howard Webb.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.