Mikil óánægja með sam­göngur til og frá Kefla­víkur­flug­velli

Ákall er eftir betri samgöngum. Forsvarsmenn Strætó eru ósáttir við aðgengi og leiðbeiningar í Leifsstöð og rútufyrirtækjum er í sjálfsvald sett hve tíðar ferðir eru frá flugvellinum og marga dreymir um fluglest.

„Niðurlægjandi fyrir land og þjóð“

Pétur Marteinn Urbancic, lögfræðingur og formaður ungra Jafnaðarmanna í Reykjavík, vakti athygli á málinu á Twitter á dögunum.

„Er búinn sitja í rándýrri rútu á Keflavíkurflugvelli núna í 40 mínútur og hún er ekki enn farin af stað,“ skrifaði Pétur. Hann segir niðurlægjandi fyrir land og þjóð að þetta séu fyrstu kynni margra af Íslandi.

„Að þetta sé nánast eini möguleikinn er svo next level galið. Steinaldardæmi.“

Pétur sagði í samtali við Vísi að hann vilji lest til og frá vellinum. Þangað til það geti orðið að veruleika vill hann að opinberir aðilar sem beri ábyrgð á almenningssamgöngum tali saman og finni lausn þannig að reglulegar almenningssamgöngur verði til staðar.

„Mér finnst það bara gefið. Þetta er svo kraftheimskulegt að maður áttar sig eiginlega ekki á því hvernig þetta getur verið svona.“ sagði Pétur.

Pétur er þeirrar skoðunar að strætóaðstaðan sé óboðleg, fáir virðist nota leiðina sem tekur krók í Reykjanesbæ áður en haldið er til höfuðborgarinnar.

„Ég tek þennan strætó margoft en fer oftast út bara í Hafnarfirði til að keppa í borðtennis. Flestir þeirra fáu sem nota hann fara þar út. Strætóinn fer svona fjórum til fimm sinnum yfir daginn en oftast bara um kvöldin, ég veit eiginlega ekki hverjir ættu að nota hann til að fara upp á völl.“

Hann segir það hljóta að koma að því að lest verði notuð til að ferja fólk til og frá vellinum en það sé ekki í augsýn.

Beðið eftir að rútan fyllist og stoppað á hótelum

Ófáir Íslendinga hafa sömu sögu að segja af ferðum sínum frá Keflavíkurflugvelli með flugrútunni. Hallgrímur Helgason er meðal þeirra.

„Er þetta ekki komið út í hreint djók?“ spurði Hallgrímur í nýlegri Facebook færslu. Biðin í rútunni hafði reynst margfalt lengri en lagt hafði verið upp með.

„Fer eftir fimm,“ var mér tjáð. Það reyndust þó þrjátíu og fimm, þar sem hér var spilað af fingrum fram og beðið á meðan fólk streymdi enn út á stæðið. Engin sýnileg áætlun í gangi,“ sagði Hallgrímur.

Þá lýsir hann því hvernig rútan hafi tekið gríðarlegan krók til að stoppa á Hótel 201 í Hlíðarsmára í Kópavogi til að skila enskum hjónum á hótelið sitt.

„Ekki fundu þau farangur sinn alveg strax og máttu þar 60 farþegar bíða á stæði á meðan Rótarýmaðurinn rótaði í töskugeymslunni. Þetta tók góðar sjö mínútur.“

„Tíminn frá því að mér var sagt að rútan færi eftir fimm og að komu á BSÍ var ein klukkustund og 45 mínútur.“

Leiðin frá BSÍ umferðarstöðinni í Reykjavík til Keflavíkur kostar 3.499 krónur. Samkvæmt svörum frá þjónustuborði Flybus, sem er annað tveggja rútufyrirtækja sem hafa starfsleyfi á Keflavíkurflugvelli, eru ferðirnar til Keflavíkur skipulagðar samkvæmt tímaáætlun.

Það sama gildi þó ekki um leiðirnar í bæinn. Fyrirtækið skipuleggur ferðir sínar í samræmi við komur á flugvöllinn og segist geta tekið sér um 30-40 mínútur til þess að bíða eftir því að rúturnar fyllist áður en lagt er í hann. Leggurinn kostar þó jafnmikið, 3.499 krónur.

„Spilað af fingrum fram,“ segir Hallgrímur.

Svigrúm til að uppfylla kröfur Isavia

Í skriflegu svari frá Guðjóni Helgasyni, upplýsingafulltrúa Isavia, segir hann Isavia hafa gert samning við Airport Direct og FlyBus árið 2018 í kjölfar útboðs. Í útboðinu hafi verið gerð sú krafa að boðið sé upp á ferðir milli Keflavíkurflugvallar og höfuðborgarsvæðisins í tengslum við öll flug, á hvaða tíma sólarhringsins sem er. Fyrirtækin hafi síðan ákveðið svigrúm til þess að uppfylla þessar kröfur.

Hann segir Airport Direct vera með ferðir samkvæmt tímaáætlunum frá Keflavíkurflugvelli á meðan FlyBus haga tíðni ferða eftir umfangi hverju sinni. Guðjón tekur sérstaklega fram að Isavia eigi í góðu samstarfi við þessi fyrirtæki.

Varðandi betra aðgengi og upplýsingar um strætóleið segir Guðjón Isavia ávallt opið fyrir samtali við Strætó.

Núverandi leið tímaskekkja

Ekki fer þó mikið fyrir Strætósamgöngum á Keflavíkurflugvelli. Guðmundur Heiðar Helgason, upplýsingafulltrúi Strætó, segir leið 55, sem fer til Keflavíkur frá Reykjavík, vera tímaskekkju.

Leið 55 var áður fyrr rekin af Sambandi sveitarfélaga á Suðurnesjum. 

Guðmundur bendir á að í dag beri Vegagerðin ábyrgð á skipulagningu kerfisins, á meðan Strætó er í nokkurs konar þjónustuhlutverki.

„Leiðin eins og hún er í dag er tímaskekkja, enda er hún enn í sömu mynd og þegar samband sveitarfélaga á Suðurnesjum rak hana og átti þá að þjónusta íbúa Reykjanesbæjar,“ sagði Guðmundur í samtali við Vísi.

„Við höfum samt sem áður bent á að aðgengi Strætó í Leifsstöð er alls ekki nógu gott. Þegar maður á að taka Strætó í bæinn frá flugstöðinni verður maður að labba á götu sem heitir Kjóavellir, þar sem er illa merkt bárujárnsskilti, það er alls ekki nógu gott.“

Hann segir Isavia hafa verið hikandi við að merkja betur hvar Strætó stoppi.

„Þetta hefur gengið brösulega og ekkert gerst í mörg ár.“

Hrun í aðsókn en heildarendurskoðun á dagskrá

Vísir fjallaði um það nýlega að aðsókn í Strætó á landsbyggðinni hafi hrunið undanfarin ár. Halldór Jörgensson, forstöðumaður almenningssamgöngudeildar Vegagerðarinnar, boðar heildarendurskoðun á Strætó á landsbyggðinni.

„Við erum bara að endurskoða allt leiðarkerfið og þessi leið er hluti af því,“ segir Halldór þegar hann var spurður út í bættar Strætóleiðir til og frá Keflavíkur. Hann vildi ekki tjá sig beint um hvort vilji væri hjá Vegagerðinni til þess að koma á tíðari ferðum eða nýrri strætóleið til og frá Keflavíkur og höfuðborgarsvæðisins.

„Þetta leiðarkerfi verður væntanlega óbreytt næstu eitt til tvö árin en það þarf tíma til að skoða hvernig best sé að bæta þetta kerfi.“

Hann segist þurfa að kanna betur hvort notendur séu sáttir við þessa leið eða ekki.

Hvað með lest?

Umræða um flugflest frá Keflavíkurflugvelli til Reykjavíkur hefur verið nefnd reglulega undanfarin ár sem möguleiki fyrir greiðar samgöngur til og frá flugstöðinni. Runólfur Ágústsson stjórnarformaður í Fluglestinni sagði í Reykjavík síðdegis á dögunum að slík lest væri gott fyrsta skref í lestarsamgöngum á Íslandi.

Hann sagði að meginforsenda fyrir framkvæmdunum væri sú að þær stæðu að minnsta kosti að einhverju leyti undir sér. Með ferðamönnum, sem kæmu til með að nýta sér fluglest, væri kominn raunhæfur kostur.

„Þetta snýst náttúrulega allt um farþegafjölda. Lest milli Keflavíkurflugvallar og Reykjavíkur út frá þessum forsendum, þeir sem eru daglegir notendur eru að greiða allt önnur verð en túristar sem eru að borga eina ferð,“ segir Runólfur.