Hilary Duff gerði garðinn frægan í hlutverki táningsstúlkunnar Lizzie McGuire á Disney sjónvarpsstöðinni árin 2001-2004. Hún varð fljótt ein vinsælasta barnastjarna í heimi og lék í fjölmörgum vinsælum unglingamyndum.
Árið 2019 var svo tilkynnt að til stæði að gera nýja þáttaröð um Lizzie McGuire. En vegna ágreinings á milli Duff og Disney var hætt við þau áform. Að mati Duff átti Disney erfitt með að leyfa McGuire að fullorðnast.
„Hún á bara að vera 30 ára kona að gera fullorðinslega hluti. Hún hefði ekkert þurft að vera að reykja bong og eiga stöðugt einnar nætur gaman, en þetta hefði þurft að vera raunverulegt,“ segir Duff í forsíðuviðtali Women's Health.
Glímdi við átröskun sem unglingur
Því fylgdi mikil útlitsleg pressa að vera barnastjarna og glímdi Duff meðal annars við átröskun á sínum unglingsárum.
„Í mínu starfi þá hugsa ég ósjálfrátt: Nú er ég fyrir framan myndavélina og leikkonur eru grannar.“
Hún segist hafa eytt mörgum árum í það að reyna passa inn í staðalímynd Hollywood. Í dag er hún hins vegar með aðrar áherslur og skiptir andleg líðan hana mestu máli.
Hún leggur mikla áherslu á það að mæta til sálfræðings og segist hún hafa sett sér það markmið að mæta í hvern einasta tíma þangað til hún byrjar í tökum á þáttunum How I Met Your Father í júní.
„Við vinnum af okkur rassgatið til þess að koma líkamanum í form og líta sem best út. Við förum í andlitssnyrtingu, Botox, klippingu og strípur, augabrúnir og augnháralyftingu og allt þetta rugl. En ég vil vinna í mér að innan. Það er mikilvægasti hlutinn af okkur.“
Æfir fjórum sinnum í viku
Hún vinnur þó einnig í líkama sínum og æfir hún fjóra daga vikunnar hjá þjálfaranum Dominic Leeder. Hún segir Bosu jafnvægisbolta vera í sérstöku uppáhaldi. Á hvíldardögum fer hún svo í göngutúra eða spilar tennis.
„Ég er stolt af líkamanum mínum. Ég er stolt af honum fyrir að hafa gengið með þrjú börn fyrir mig. Ég hef tekið í sátt þær breytingar sem hann hefur gengið í gegnum.“
Duff sem er 34 ára gömul á þau Banks, þriggja ára, og Mae, eins árs, með eiginmanni sínum Matthew Koma. Þá á hún einnig soninn Luca, tíu ára, með fyrrverandi eiginmanni sínum.
Bendir á að líkaminn hafi verið farðaður og uppstilltur
Í dag segist Duff vera sátt í eigin skinni, hún hafi komist á þann stað eftir að hún eignaðist annað barnið sitt.
„Ég vissi ekki hvort ég fengi tækifæri til þess að eignast annað barn. Þannig að það að verða mamma aftur var mjög valdeflandi fyrir mig,“ en Duff er með orðið Mother húðflúrað á sig.
Duff er óneitanlega stórglæsileg í myndatökunni fyrir tímaritið og hefur hún sjaldan litið betur út. Hún bendir fólki þó á að á myndunum sé henni stillt upp þannig að líkami hennar líti sem best út. Þá hafi förðunarfræðingur verið á settinu sem sá til þess að líkami hennar ljómaði á öllum réttu stöðunum.
„Ég hló mikið á meðan ég var að pósa í þessum stellingum án þess að vera í uppháu gallabuxunum og víðu peysunni sem ég er í venjulega,“ skrifar Duff um myndatökuna á Instagram-síðu sinni.
