Dallas Mavericks náði sínum fyrsta sigri í einvíginu gegn Phoenix Suns sem hafnaði efst í Vesturdeildinni í vetur. Leiknum lauk með níu stiga sigri Dallas, 103-94.
Luka Doncic fór fyrir liði sínu líkt og áður en Slóveninn gerði 26 stig auk þess að rífa niður þrettán fráköst og gefa níu stoðsendingar. Jalen Brunson var stigahæstur í liði Dallas með 28 stig.
Byrjunarliðsmenn Phoenix Suns dreifðu stigaskorun mjög jafnt á milli sín en Jae Crowder endaði leikinn stigahæstur með nítján stig og Devin Booker gerði átján.
Sömu sögu var að segja austanmegin þar sem Philadelphia 76ers minnkaði muninn í 2-1 í einvígi gegn toppliði Austurdeildarinnar, Miami Heat. Sixers vann öruggan 20 stiga sigur í nótt, 99-79.
Danny Green og Tyrese Maxey gerðu 21 stig hvor á meðan Jimmy Butler var allt í öllu í sóknarleik Miami Heat með 33 stig.
